Најдобриот стрелец во НБА лигата, Лука Дончиќ, предвреме го заврши синоќешниот натпревар помеѓу Лос Анџелес Лејкерс и Филаделфија. Словенечкиот кошаркар се упати кон соблекувалната во текот на втората четвртина, а медицинскиот тим подоцна потврди дека тој нема да се враќа на теренот.
Проблеми со левата нога во првото полувреме
Инцидентот се случи на три минути пред крајот на првиот дел. Дончиќ почна видливо да куца по еден напад на противничката половина, по што веднаш побара замена. Иако првичните прогнози беа оптимистични, стручниот штаб на Лејкерс одлучи да не ризикува со својата прва ѕвезда поради болки во левата нога.
Пред да излезе од игра, Словенецот имаше необично слаба вечер според неговите стандарди, а запиша само 10 поени, 4 скока и дури 5 изгубени топки, со реализација 0/4 за три поени.
Неизвесен настап на Ол-стар викендот
Повредата доаѓа во моментот кога Дончиќ доминира во лигата, со просек од 33.4 поени по натпревар. Словенецот неодамна беше прогласен за играч на месецот на Западот, а веќе следната недела требаше да се појави како стартер на својот шести Ол-стар натпревар во Инглвуд. Сега, неговото учество на овој настан, но и клучните мечеви за Лејкерс во борбата за плеј-оф, се под знак прашалник.
Иако Лејкерс се обидуваат да изградат тимска кохезија, јасно е дека целата нивна игра ротира околу продуктивноста на Дончиќ. Секое негово отсуство, дури и ако е краткотрајно, е огромен чекор наназад за тимот од Калифорнија.
