Додека Формула 1 светот се подготвува за рекордна сезона со 24 трки, сите погледи се насочени кон 13 септември 2026 година. Тогаш Мадрид, по пауза од 45 години, повторно ќе биде домаќин на Големата награда на Шпанија на својата сосема нова, комбинирана патека наречена „Мадринг“.
„La Monumental“ – новиот страв и трепет за возачите
Секоја култна патека има свој заштитен знак, а Мадрид го подготви својот одговор на легендарните делови од Спа и Сузука. Тоа е кривината „La Monumental“ – застрашувачки десен кружен свиок долг 547 метри со наклон од дури 24 степени. За споредба, тоа е пострмно од познатиот Зандворт (18 степени) и се приближува до наклоните на американската патека Дајтона (31 степен).
Покрај оваа кривина, патеката ќе има и два тунели, карактеристика која досега ја имаа само Монако и Абу Даби, што дополнително ќе ја зголеми атрактивноста за гледачите и предизвикот за самите возачи.
Роковите се почитуваат: Тест настан во август
Генералниот менаџер на патеката, Луис Гарсија Абад, потврди дека градежните работи на комплексот IFEMA се одвиваат според планот. Поставувањето на асфалтот е во тек, а патеката треба да биде комплетно завршена до крајот на мај. Веднаш потоа следи монтирање на 100.000 седишта на трибините и специјалните ВИП-зони за гости.
„Не сакам проблеми. Сакам да бидам сигурен дека сè е на своето место“, вели Абад, најавувајќи голем тест настан во август кој ќе се одржи зад затворени врати за да се провери работата на електрониката, редарите на патеката и безбедносните протоколи за влечните возила.
Очекувања: 400.000 навивачи и домашни херои
Интересот за трката е огромен – веќе се продадени над 80.000 влезници, а организаторите предвидуваат дека за време на тркачкиот викенд во септември ќе има околу 400.000 посетители. Со тоа, Мадрид би влегол во елитното друштво на најпосетувани трки заедно со Силверстон и Мелбурн.
Локалните ѕвезди, Карлос Саинц и Фернандо Алонсо, веќе помагаат со свои совети за изгледот на кривините и точките за престигнување. Саинц минатиот јуни веќе „запали“ дел од трасата со својот болид пред 80.000 фанови, најавувајќи го она што нè очекува во 2026 година. Иако има и одредени протести од локалното население поради бучавата, Мадрид е решен да го организира најдобриот Ф1 настан на Иберискиот Полуостров.
