Македонската ракометна репрезентација вечерва од 19:00 часот го започнува одлучувачкиот бараж-двомеч против селекцијата на Словачка за пласман на Светското првенство 2027 година. Првата станица на избраниците на Кирил Лазаров е арената во Прешов, каде нашиот национален тим ќе бара позитивен резултат кој ќе ги подотвори вратите кон Мундијалот пред реваншот во Скопје.
Лекциите се научени: Лазаров бара максимален фокус
Селекторот Кирил Лазаров пред заминувањето за Словачка потенцираше дека тимот е созреан и дека се извлечени поуки од минатогодишните пресметки со Фарските Острови. Тој нагласи дека влогот е огромен, бидејќи континуитетот на големите натпреварувања е клучен за развојот на оваа генерација.
Искуството како главен адут во Прешов
Иако Македонија влегува во овој двомеч со епитетот фаворит, во националниот табор владее максимална претпазливост. Ова е првпат овие две репрезентации да се соочат во официјален натпревар, а голманот Никола Митревски предупредува дека токму непознавањето на противникот на негов терен е најголемиот предизвик.
Фокусот на „црвено-жолтите“ е насочен кон градење на активен резултат. Митревски потенцира дека во Словачка ништо нема да биде конечно решено, со оглед на тоа што за три дена не очекува решавачкиот реванш пред домашната публика во Скопје.
Нашиот стручен штаб веќе ги скенираше претходните мечеви на Словачка за да се неутрализира нивната игра на домашен терен, додека бројните настапи на претходните големи сцени треба да им ја дадат на нашите ракометари потребната смиреност во клучните моменти. Основната цел е да се наметне наш сопствен ритам и да се искористи секоја шанса во нападот, со што би се обезбедил „мирен“ и позитивен реванш пред домашната публика во Скопје.
Реваншот се игра за три дена во Скопје, каде се очекува пеколна атмосфера и конечна потврда на патната исправа за Германија.
