Во моменти кога македонскиот спорт слави нов голем успех, пораката која пристигна од најуспешниот ракометен колектив во државата, РК Вардар, предизвика огромно внимание и позитивни коментари. Иако големи ривали на теренот, „црвено-црните“ покажаа врвна спортска големина честитајќи му го на ГРК Охрид пласманот во финалето на ЕХФ Европскиот Куп.
„Успех што заслужува аплауз“
Преку емотивна објава на социјалните мрежи, од Вардар истакнаа дека пласманот во едно европско финале е чиста потврда за квалитетот, посветеноста и напорната работа на еден клуб.
„Кога македонски клуб испишува европска приказна, тоа е успех што заслужува аплауз. На ГРК Охрид му посакуваме многу среќа во финалето, достоинствен настап и уште еден голем момент за македонскиот спорт“.
Овој потег на скопскиот клуб е вистински пример за тоа како треба да се негува заемната почит меѓу македонските претставници кога станува збор за националниот интерес и гордоста на сите што го сакаат ракометот во Македонија.
Охрид оди по европскиот трон
Потсетуваме, екипата на ГРК Охрид испиша историја во преполната сала „Билјанини Извори“ откако во реваншот го совлада словенечкиот гигант Целје Пивоварна Лашко по изведување на седмерци (29-27). Ова е втора година по ред македонскиот клупски ракомет да има свој претставник во финалето на ова натпреварување, по ланскиот успех на Алкалоид.
Во големата борба за трофејот, охриѓани ќе ги одмерат силите со унгарската екипа Татабања, каде настапува македонскиот репрезентативец Филип Талески. Со ваква поддршка од целата спортска јавност, вклучително и од великани како Вардар, Охрид со полни едра ќе плови кон првата европска титула во клупската историја.
Следете нè: Facebook | Instagram | X
