Иако вчера вечерта се запиша во листата на стрелците по асистенцијата на Елиф Елмас, Скот Мектоминеј не го криеше своето незадоволство по нерешениот резултат на Наполи против Копенхаген (1:1). Овој кикс на италијанскиот тим ги остави „партенопеите“ на 23-та позиција на табелата во Лигата на шампионите, со само еден преостанат натпревар до крајот на првата фаза.
„Моравме да го решиме мечот со втор и трет гол“
Шкотот му донесе водство на својот тим само четири минути откако домаќините останаа со играч помалку, но Наполи не успеа да ја капитализира надмоќноста на теренот.
„Требаше да го добиеме тој натпревар, ова е неприфатливо. Моравме да постигнеме втор и трет гол за да го затвориме мечот, дури и ако теренот беше тежок за игра. Навистина е разочарувачки што не успеавме во тоа“, изјави фрустрираниот Мектоминеј за „Sky Sport Italia“.
Повредите како фактор, но не и оправдување
Наполи во Данска настапи без клучните играчи како Лукаку, Де Брујне и Ангиса, а на листата отсутни вчера беа и Рахмани и Давид Нерес.
„Имаме многу повреди, што е реткост во толкав број, но се трудиме да се подобруваме од натпревар во натпревар. Замените кои влегуваат ја вршат својата работа, но сите заедно мораме да бидеме уште подобри“, додаде играчот од средниот ред.
За Наполи сега следува „да се биде или не“ битка против Челси во последното коло, што ќе биде последна шанса за тимот на Антонио Конте да обезбеди пласман во плеј-оф рундата. „Челси е одличен тим. Мораме да ги погледнеме нашите грешки и да го дадеме максимумот ако сакаме да продолжиме во Европа“, заклучи Мектоминеј.
