Вечерашното дерби меѓу Милан и Интер не е само обичен натпревар за Скудетото – за Лука Модриќ ова можеби е последниот голем танц на „Сан Сиро“. Токму затоа, хрватскиот велемајстор одлучи ништо да не препушти на случајноста кога е во прашање поддршката.
Приватен авион и 60 билети за „хрватската експедиција“
Како што открива италијанскиот „Скај“, Модриќ лично купил 60 влезници за вечерашниот спектакл. Но, тој не застана тука, па фудбалерот на Милан на свој трошок организирал и транспорт за голем дел од своите пријатели и членови на семејството кои допатуваа директно од Хрватска.
Меѓу елитните гости на трибините ќе се најде и неговиот долгогодишен соборец од репрезентацијата, Марио Манџукиќ, кој веќе неколку дена престојува во домот на Модриќ во Милано.
Дали е ова последното дерби за Лука?
Овој емотивен и скап гест на Модриќ само ги подгреа шпекулациите дека тој се подготвува за збогување. Неговиот договор со Милан истекува во јуни, а иако постои опција за продолжување до 2027 година, таа сè уште не е активирана. Со оглед на тоа што вечерва се решава судбината на титулата против Интер на Кристијан Киву, Лука сакаше покрај себе да ги има луѓето кои му значат најмногу.
Милан на Макс Алегри ќе има „екстра ветер“ во грбот, а со оглед на тоа каков професионалец е Модриќ, неговите 60 гости сигурно ќе имаат што да видат на теренот.
