Францускиот репрезентативец Ибрахима Конате и официјално е нов фудбалер на Реал Мадрид. Одличниот дефанзивец, кој моментално ги брани боите на својата репрезентација на Светското првенство, стави потпис на четиригодишен договор со шпанскиот гигант.
Трансферот се реализираше откако на 27-годишниот фудбалер му истече договорот со Ливерпул, по што тој реши да не ја продолжи соработката со премиерлигашот и на „Сантијаго Бернабеу“ пристигнува како слободен играч.
Ова е трето големо засилување за Реал Мадрид во овој летен преоден рок. Претходно, клубот веќе ги осигура услугите на Бернардо Силва (кој исто така пристигна како слободен играч по заминувањето од Манчестер Сити), како и Марк Кукуреља, за чиј трансфер од Челси беа платени 60 милиони евра. Според најавите, раководството на Мадристите тука не запира и веќе го подготвува следниот потег – ангажман на бекот на Интер, Дензел Думфрис.
💥 This is how @IbrahimaKonate_ plays! pic.twitter.com/WsqsR6nEn5
— Real Madrid C.F. 🇬🇧🇺🇸 (@realmadriden) June 18, 2026
Реал Мадрид како експерт за „слободни агенти“
Со ангажманот на Конате, раководството на Реал Мадрид уште еднаш потврди дека е апсолутен експерт за искористување на пазарот на слободни играчи. Во изминативе неколку години, преку истата стратегија, шпанскиот клуб успеа бесплатно да доведе светски ѕвезди како Трент Александер-Арнолд, Килијан Мбапе, Антонио Рудигер и Давид Алаба.
Потребата за нов централен дефанзивец во Мадрид стана алармантна поради две клучни причини. Првата е заминувањето на Давид Алаба од клубот ова лето, кој и покрај малата минутажа имаше огромно влијание во соблекувалната. Втората, и многу посериозна причина, е повредата на задната ложа на Едер Милитао, поради која Бразилецот ќе отсуствува од терените околу четири месеци.
Во вакви околности, Конате претставува идеално решение. Тој носи драгоцено искуство од Премиер лигата и меѓународната сцена, а за место во стартниот тим ќе води битка со Антонио Рудигер, Дин Хујсен, Раул Асенсио и Едер Милитао (по неговото враќање).
Проблеми во најава за дефанзивниот бедем на Ливерпул
Заминувањето на Конате претставува сериозен удар за Ливерпул. Французинот пристигна на „Енфилд“ во 2021 година од РБ Лајпциг (откако клубот ја активираше неговата откупна клаузула од 35 милиони фунти) и брзо се етаблираше како редовен партнер на Вирџил ван Дајк, забележувајќи вкупно 183 настапи за „Црвените“.
Ливерпул сега се соочува со сериозен дефицит на стоперската позиција. Покрај Ван Дајк, опциите се сведени на Џо Гомез (кој пропушти дури 34 натпревари во последните две сезони поради повреди) и младиот Џовани Леони (чија дебитантска сезона заврши уште во септември поради кинење на предните вкрстени лигаменти). За да ја пополни празнината, Ливерпул веќе го договори 20-годишниот Џереми Жакет од Рен, во трансфер вреден 55 милиони фунти (плус 5 милиони во бонуси), но останува да се види колку брзо младиот дефанзивец ќе може да се адаптира на притисокот во Премиер лигата.
