На денешен ден, 6 октомври 1985 година, на легендарниот Брендс Хач во Англија, историјата се сврте во корист на еден човек кој не возеше со страст како Сена, ниту со сурова агресија како Пике, туку со чист ум, ладна глава и совршена пресметка. Тоа беше денот кога Алан Прост го освои својот прв светски шампионат.
Ниту подиум, ниту сензација, ниту возбудлива трка, туку тивка, интелигентна победа на стратегијата над хаосот.
Французинот не мораше да победи во трката за да ја победи сезоната. Пред трката за Големата европска награда, Прост имаше 16 поени предност пред Микеле Алборето и знаеше дека петтото место ќе биде доволно за да ја запечати титулата. Но трката не почна по план.
На стартот заглави зад Росберг, излета на тревата и падна до 14-то место. Секој друг би влегол во паника, но не и Прост. Методично, како часовник, ги собираше позициите една по една, додека хаосот се одвиваше пред него. Росберг се заврте, Пике се откажа, Сена го изгуби ритамот, а Алборето буквално експлодираше кога му откажа турбо моторот по само 13 круга.
Во тој момент титулата веќе беше негова. Финишираше четврти, без подиум, но со златен венец околу главата.
Во книгата што ја издаде неколку години подоцна, „Maître de mon destin“, ќе напише: “Очите ми се насолзија зад визирот. Знаев дека тоа е мојот момент на чиста интензивна радост што сакав да ја почувствувам најпрво за себе, пред да ја споделам со светот”.
Од тој ден натаму, Формула 1 повеќе не беше иста. Прост ја претвори брзината во уметност на интелектот. Во свет на егзибиционисти, тој беше мајстор на тишината.
Во следните години освои уште три титули и го сруши рекордот на Фанџо. Со 51 победа, 106 подиуми и беспрекорен стил, тој стана симбол на рационалноста зад воланот.
Иронијата? Неговиот поранешен ривал и колега, Ники Лауда, подоцна ќе каже: “Мразев што го имав за тимски колега. Имав совршен болид и потоа дојде овој иритантен Французин и ме уништи. Ако не беше Прост, ќе возев уште неколку години”.
Но тоа е токму суштината на Алан Прост. Никогаш не мораше да биде најгласен, најбрз или најпопуларен. Доволно беше само да биде – најточен.
