Њујорк Никс – Оклахома Сити Тандер 100:103
Оклахома Сити Тандер продолжи со својот победнички марш, овојпат со триумф над Њујорк Никс во култниот „Медисон Сквер Гарден“. Младиот центар Чет Холмгрен одигра партија за паметење, постигнувајќи 28 поени, со што израмни рекорд на кариерата со 6 погодени тројки.
Првата ѕвезда на тимот, Шаи Гилџус-Александер, додаде 26 поени во четвртата по ред победа на „Громовите“. Никс се вратија во игра со неверојатни 40 поени во третиот период, но во драматичниот финиш Џејлен Брансон и ОГ Ануноби промашија тројки за израмнување.
Бостон Селтикс – Шарлот Хорнетс 89:118
Најголемото изненадување на вечерта се случи во Бостон, каде Шарлот Хорнетс го демолираше домашниот состав и актуелен шампион. Кон Книпел со 20 поени ги предводеше гостите до шесттата победа по ред, додека ЛаМело Бол и Брендон Милер додадоа по 18.
Бостон изгледаше исцрпено, шутирајќи само 38% од игра. Дерик Вајт со 29 поени беше единствената светла точка кај Селтикси, кои во еден момент губеа и со цели 29 поени разлика, што е еден од нивните најтешки порази сезонава.
Филделфија 76ерс – Јута Џез 106:102
Иако без својот лидер Џоел Ембид и суспендираниот Пол Џорџ, Филделфија успеа да ја прекине серијата на Јута Џез. Тајрис Макси ја презеде одговорноста и постигна 25 поени, а клучните моменти ги реши Квентин Грајмс со ладнокрвни слободни фрлања во финишот.
Јута имаше предност од шест поени на пет минути пред крајот, но влезе во црна серија промашувања, што резултираше со нивен седми последователен пораз. Кејонте Џорџ беше најефикасен кај поразените со 30 поени.
Мемфис Гризлис – Портланд Траил Блејзерс 114:122
Џру Холидеј потсети на своите најдобри денови, постигнувајќи 35 поени и 11 асистенции во победата на Портланд на гостувањето во Мемфис. Поддршка доби од Џерами Грант кој додаде 30 поени, со што Блејзерси ја прекинаа низата од два порази. Мемфис имаше дури седум играчи со двоцифрен број поени, но тоа не беше доволно да се сопре расположениот бековски тандем на гостите. За Портланд ова е важна победа во трката за плеј-ин позиција.
Милвоки Бакс – Атланта Хокс 113:131
Проблемите за Милвоки Бакс се продлабочуваат по петтиот пораз по ред. Атланта Хокс, предводена од Никел Александер-Вокер (23 поени), го прегази домаќинот со фуриозно второ полувреме во кое постигна дури 65 поени. Ова е првпат по декември Атланта да има позитивен скор во лигата. Бакси изгледаат непрепознатливо во одбраната, губејќи ги последните четири натпревари со комбинирана разлика од неверојатни 97 поени, што ги става нивните амбиции за плејоф под голем знак прашалник.
ЛА Клиперс – Индијана Пејсерс 130:107
Каваи Ленард со „хируршка“ прецизност и 29 поени ги водеше Клиперси до третата победа во низа. Тимот од Лос Анџелес го реши прашањето на победникот уште во првата четвртина (42:25), покажувајќи целосна доминација во нападот. Дариус Гарланд го одигра својот прв домашен натпревар по трејдот и додаде 12 поени, додека Индијана, предводена од Паскал Сијакам (29 поени), едноставно немаше сила да му парира на расположениот домаќин.
