Ноќта во НБА донесе убедливи победи, камбек приказни и уште еден историски момент за Кевин Дјурaнт, додека Шарлот без милост го искористи кадровскиот колапс на Денвер.
Хорнетс – Нагетс 110:87
Шарлот Хорнетс одигра зрело и дисциплинирано, казнувајќи го Денвер кој настапи без петмина од своите клучни играчи. Брендон Милер беше моторот на победата со 23 поени и уште една вечер која ја потврди неговата форма, во која во последните три натпревари бележи просек од 25,7 поени.
Клучна улога имаше и Тиџан Салаун, кој од клупата донесе енергија и контрола во рекетот со 13 поени и 11 скокови. Денвер, без Јокиќ, Гордон и уште три важни имиња, немаше одговор и доживеа една од најтешките загуби сезонава.
Рокетс – Пеликанс 119:110
Во Хјустон вечерта беше во знакот на историјата. Кевин Дјурaнт со 18 поени се искачи на шесттото место на вечната листа на стрелци во НБА, престигнувајќи го Дирк Новицки и добивајќи стоечки овации од публиката.
На паркетот, сепак, главната улога ја имаше Џабари Смит Џуниор со сезонски рекордни 32 поени, додека Шенгун и Амен Томпсон обезбедија стабилност и темпо. Њу Орлеанс се обиде да се врати преку Зион Вилијамсон и Треј Марфи, но континуитетот на Рокетс беше пресуден.
Гризлис – Меџик 126:109 (Лондон)
Џа Морант се врати на големата сцена со стил, со 24 поени и 13 асистенции во првиот НБА натпревар во Лондон по 2019 година. Мемфис доминираше од старт, создаде огромна предност и рутински ја приведе средбата до крај.
Орландо накратко се доближи во последната четвртина, но Гризлис не дозволија драма. Европската НБА турнеја уште еднаш покажа дека лигата сериозно гледа кон проширување на глобалното влијание.
Лејкерс – Репторс 110:93
Лос Анџелес Лејкерс се вратија на победнички пат зад одличното трио Дончиќ, Леброн и Ејтон. Лука Дончиќ постигна 25 поени со пет тројки, Леброн додаде 24, а Деандре Ејтон одигра совршен натпревар со 25 поени и 13 скокови без промашување.
Торонто се држеше до третата четвртина, но падна во финишот, додека Лејкерс конечно изгледаа како тим што ја пронаоѓа својата рамнотежа пред долгата гостинска турнеја.
Булс – Нетс 124:102
Чикаго Булс од самиот почеток наметна темпо и не дозволи никакво изненадување против Бруклин. Коби Вајт со 24 поени и Ајо Досунму со клучни серии ја решија средбата уште во првото полувреме.
Нетс продолжуваат со лошата серија и повторно изгледаа без јасна идеја во нападот, додека Булс ја искористија широчината во ростерот и контролата на рекетот.
Трејл Блејзерс – Кингс 117:110
Дени Авдија се врати како да не отсуствувал, со 26 поени, осум асистенции и осум скокови во победата на Портланд во Сакраменто. Заедно со Шејдон Шарп и Доминик Клингaн, Блејзерс повторно покажаа дека се еден од најжешките тимови во моментот.
Сакраменто се обиде да одговори преку Монк и Вестбрук, но Портланд ја диктираше играта и стигна до деветта победа во последните 12 натпревари.
