Изминатата ноќ во НБА лигата беше во знакот на еден од највозбудливите дуели во поновата историја. Во судир на двајца кандидати за МВП, Никола Јокиќ и Виктор Вембањама приредија вистински спектакл кој заврши со победа на Денвер Нагетс над Сан Антонио Спурс од 136-134 по продолженија.
Битка на титаните: Историскиот Јокиќ против нестварниот Вембањама
Никола Јокиќ уште еднаш докажа зошто е трикратен МВП. Србинот постигна 40 поени, додаде 13 асистенции и 8 скокови, но она што влегува во историјата е неговата беспрекорна игра – тој стана првиот центар во историјата на НБА со 40+ поени и 10+ асистенции на еден меч без ниту една изгубена топка.
Од другата страна, младиот француски феномен Виктор Вембањама беше речиси еднакво импресивен. По враќањето од повреда, тој запиша 34 поени, 18 скокови, 7 асистенции и 5 блокади. Спарс водеа во поголемиот дел од мечот, но не успеаја да го издржат финалниот налет на шампионот. Јокиќ во клучните моменти го пронајде Арон Гордон за забивање кое го одведе мечот во продолженија, каде Денвер конечно ја прекина серијата на Сан Антонио од 11 победи по ред.
Тензии на теренот: „Тупаница“ во лицето на Јокиќ
Мечот не помина без инциденти. Кон крајот на првата четвртина, Вембањама ненамерно го удри Јокиќ во лицето, но судиите не досудија прекршок. Ова предизвика бес кај тренерот на Денвер, Давид Аделман и Арон Гордон, кои заработија технички грешки, а ситуацијата беше толку конфузна што Спарс добија слободни фрлања иако Јокиќ беше тој што го извлече подебелиот крај. Сепак, тоа само ја зголеми мотивацијата кај Нагетс да направат голем пресврт од -11 во последната четвртина.
Детроит Пистонс се први на Истокот по 19 години!
Додека Западот „гори“, на Истокот е завршена големата трка за пол-позицијата. Детроит Пистонс со победата над Филаделфија (116-93) и официјално го обезбедија првото место во конференцијата. Ова е првпат по 2007 година „Пистонси“ да бидат први носители, а импресивно е што тоа го направија без својата прва ѕвезда Кејд Канингем, кој отсуствува поради проблеми со белите дробови. Јален Дурен и дебитантот Денис Џенкинс беа клучни во триумфот, додека Филаделфија без Ембид падна на седмото место, што ги води во плеј-ин зоната.
Мајами Хит немилосрдни против Вашингтон
Во еден од најефикасните мечеви на вечерта, Мајами славеше против Вашингтон со 152-136. Хаиме Хакез Јуниор блесна со 32 поени од клупата, а младиот Кел’ел Вер запиша монструозна партија со 24 поени, 19 скокови и 8 блокади. Ова е важна победа за Мајами во обидот да го подобрат својот ранкинг пред плеј-ин турнирот.
