Хјустон Рокетс – ЛА Клиперс 102:105
Кога Каваи Ленард ќе влезе во својот „терминатор“ мод, спасување нема. Иако Клиперси се мачеа три четвртини, Каваи реши дека не оди на одмор со пораз. Постигна дури 19 поени само во последната четвртина (вкупно 27 поени и 12 скокови), а круната беше неговиот „фејдавеј“ шут преку рака со фаул на две секунди пред крајот.
Хјустон имаше шанса за продолжение преку Тари Исон, но неговиот шут за три заврши на обрачот. Кај Рокетс, Кевин Дјурант уфрли 21 поен, но младиот Алперен Шенгун трагично промаши едно слободно фрлање на 7 секунди до крајот кое можеше да го смени текот на мечот.
Кливленд Кавалирс – Вашингтон Визардс 138:113
Цел Кливленд дојде да го види првиот домашен меч на Џејмс Харден во „винско-златниот“ дрес, но на крајот сите си заминаа зборувајќи за Сем Мерил. Мерил одигра партија на животот со рекордни 32 поени, додека Донован Мичел додаде 30.
„Брадата“ Харден одигра паметно, не форсираше шут (1/4), но ги разигруваше соиграчите со 11 асистенции за само 28 минути. Кливленд потврди дека е во страшна форма со 10 победи на последните 11 меча и моментално изгледаат како најголема закана за врвот на Истокот.
Филаделфија 76 – Њујорк Никс 89:138
Ова не беше кошаркарски натпревар, туку класична егзекуција. Филаделфија без повредениот Џоел Ембид изгледаше како аматерски тим. Њујорк Никс, предводени од „новото“ засилување Хозе Алварадо (26 поени, 8 тројки), ги демолираа домаќините со неверојатни 49 поени разлика.
Ова е најнискиот број на поени на Филаделфија сезонава, а Никс покажаа дека со Таунс (21 поен, 11 скокови) и Брансон се подготвени за највисоки дострели. Тајрис Макси со 32 поени беше единствената светла точка во темнината на Сиксерси.
Минесота Тимбервулвс – Портланд Трејлблејзерс 133:109
Џулиус Рендл реши да им покаже на сите дека му е местото на Ол-стар мечот. Со 41 поен и доминација во рекетот, тој едноставно го „изеде“ Портланд. Натпреварот го заврши со спектакуларно забивање кое ја крена целата арена на нозе. Иако Ентони Едвардс беше болен и играше со намален капацитет (14 поени), Рендл и Мекданиелс (21 поен) завршија огромна работа. Портланд изгуби 25 топки, што е премногу за да се надевате на успех во Минесота.
Денвер Нагетс – Мемфис Гризлис 122:116
Никола Јокиќ влезе во „ол-стар“ расположение малку порано. Неговиот 184-ти трипл-дабл во кариерата (26 поени, 15 скокови, 11 асистенции) беше доволен да се сопре жилавиот Мемфис. Денвер водеше со 15 поени во последната четвртина, но кога Јокиќ седна на клупата, Мемфис направи серија и дојде на само неколку поени заостанување. Сепак, Џамал Мареј со мирна рака од линијата за слободни фрлања (4/4 во финишот) ја запечати победата. Тим Хардавеј Џуниор исто така беше одличен со 21 поен.
Бостон Селтикс – Чикаго Булс 124:105
Селтикси влегуваат во паузата како „владетели“ на Истокот. Пејтон Пратчард уфрли 26 поени, а Џејлен Браун додаде 24 во победата над Чикаго. Ова беше посебен меч за Никола Вучевиќ, кој дебитираше за Бостон против својот поранешен тим и веднаш запиша дабл-дабл (19 поени, 11 скокови). Бостон водеше со 28 поени уште на полувремето, па во вториот дел Џо Мазула можеше да ги одмори своите главни ѕвезди.
Орландо Меџик – Милвоки Бакс 108:116
Новата ера во Милвоки почна ветувачки. Кем Томас, кој потпиша како слободен агент во неделата, уфрли 34 поени во својот само втор меч за Бакс. Сепак, сеопфатниот учинок на Кевин Портер Џуниор беше пресуден – тој го запиша својот петти трипл-дабл во кариерата (18 поени, 10 скокови, 11 асистенции). Бакс целосно го надскокаа Орландо (47-30), а кај Меџик не помогна ниту одличната партија на Десмонд Бејн со 31 поен.
Феникс Санс – Оклахома Сити Тандер 109:136
Актуелниот шампион Оклахома Сити Тандер не покажува знаци на замор. Џејлен Вилијамс ги „растури“ Санси со 28 поени и шут од поле 11/12! Тандер водеа со 37 поени разлика во еден момент, покажувајќи дека нивната клупа е најсилна во лигата (74 поени од резервите). Феникс, кој сè уште се привикнува на животот без Дурант, немаше одговор за брзата транзиција на гостите.
Кратки вести од останатите терени:
- Шарлот – Атланта 110:107: Брендон Милер (31 поен) го предводеше Шарлот до 10-та победа на последните 11 меча, иако тимот играше без двајца суспендирани стартери (Бриџис и Диабате).
- Голден Стејт – Сан Антонио 113:126: Спурс влегуваат во паузата со 6 победи во низа! Вембањама (26 поени) и Де’Арон Фокс (27 поени) го „замолкнаа“ Сан Франциско.
- Торонто – Детроит 95:113: Пистонс ја продолжија серијата против Рапторс со доминантна игра во рекетот (50 поени во бојата) и одличен Канингем (28 поени).
- Бруклин – Индијана 110:115: Пејсерси покажаа херојски дух. Без осум клучни играчи, успеаја да слават во Бруклин со тројка на Кам Џонс во финишот.
- Њу Орлеанс – Мајами 111:123: Бам Адебајо (27 поени, 14 скокови, 4 блокади) беше пресилен за Зајон и Пеликанс. Мајами има 11 победи на последните 12 дуели со овој ривал.
- Јута – Сакраменто 121:93: Јарен Џексон Џуниор со 23 поени во дебито ги донесе „џезерите“ до лесна победа. Кингс се во длабока криза со 14 порази по ред.
