Вечерта во НБА лигата беше во знакот на историските рекорди и неверојатните пресврти. Додека младиот Макси го симна од тронот легендарниот Ајверсон во Филаделфија, дебитантот Кнупел постави нови стандарди кај новајлиите, а Кевин Дјурант потсети зошто е еден од најдобрите на сите времиња.
Филаделфија 76ерс 124-117 Мајами Хит
Тајрис Макси стана нов сопственик на рекордот за најмногу постигнати тројки во историјата на Филаделфија 76ерс, престигнувајќи го легендарниот Ален Ајверсон. Макси го заврши натпреварот со 28 поени и 11 асистенции, а рекордот го собори уште во првата четвртина во која постигна дури 20 поени со перфектен шут од далечина.
Џоел Ембид придонесе со „дабл-дабл“ учинок од 26 поени и 11 скока, помагајќи му на тимот да ја задржи предноста откако Мајами успеа да ја анулира негативата од 16 поени на полувремето. Кај гостите од Флорида, најефикасен беше Бам Адебајо со 29 поени и 14 скока.
Хјустон Рокетс 113-108 Орландо Меџик
Кевин Дјурант потврди зошто сè уште е еден од најопасните поентери во лигата, постигнувајќи 26 од своите вкупно 40 поени во второто полувреме. Хјустон успеа да надополни негатива од 19 поени во третата четвртина благодарение на фуриозната серија од 21-0 која траеше нешто помалку од четири минути.
Младиот Рид Шепард беше клучен фактор од клупата со 20 поени, додека кај Орландо Меџик недоволни беа 30-те поени на Десмонд Бејн и сеопфатната партија на Паоло Банкеро (19 поени, 9 асистенции и 8 скока).
Феникс Санс 113-110 Лос Анџелес Лејкерс
Феникс Санс успеаја да слават против Лос Анџелес Лејкерс во натпревар кој се реши во последната секунда. Ројс О’Нил беше херојот на домашните, постигнувајќи ја клучната тројка на 0.9 секунди до крајот по асистенцијата на Колин Гилеспи.
Лука Дончиќ одигра уште еден статистички импресивен натпревар за Лејкерси со 41 поен, 8 скока и 8 асистенции, и беше најзаслужен за враќањето на неговиот тим од двоцифрена негатива во финишот, но Остин Ривс го промаши шутот за три поени со звукот на сирената.
Шарлот Хорнетс 133-109 Индијана Пејсерс
Дебитантот на Шарлот Хорнетс, Конор Кнупел, го собори рекордот на Киган Мареј за најмногу постигнати тројки од страна на дебитант во една сезона. Кнупел постигна 28 поени со осум погодени тројки (вкупно 209 во сезоната), а најефикасен кај Хорнетс беше Брендон Милер со 33 поени.
Хорнетс ја продолжија својата одлична форма на гостински терен со деветтата последователна победа надвор од дома, додека Индијана продолжи со дефанзивната криза примајќи над 130 поени на трет последователен натпревар.
Атланта Хокс 126-96 Вашингтон Визардс
Си-Џеј Мекколум и Кори Кисперт одиграа клучна улога во убедливата победа на Атланта над Вашингтон, постигнувајќи вкупно 58 поени. Кисперт постави рекорд на кариерата со 33 поени, додека Мекколум додаде 25 поени во втората победа по ред за Хокс. Вашингтон Визардс беа сериозно ослабени со неиграњето на Ентони Дејвис и Тре Јанг, кои ги пропуштија натпреварот поради повреди.
Сан Антонио Спарс 126-110 Бруклин Нетс
Сан Антонио Спарс ја забележаа својата 11-та победа по ред, што е нивна најдолга низа од сезоната 2015/16. Џулијан Шампани со 26 поени беше најефикасен кај гостите, додека Виктор Вембањама имаше поскромен поентерски учинок од 12 поени. Кај Бруклин, Мајкл Портер Џуниор забележа 24 поени и 14 скока, но Нетс не успеаја да го избегнат шестиот пораз во низа.
Сакраменто Кингс 130-121 Далас Маверикс
Сакраменто Кингс успеаја да изненадат во Далас благодарение на рекордните 29 поени на Пресиус Ачиува. Далас Маверикс го претрпеа единаесеттиот пораз во последните 13 натпревари и покрај тоа што Наџи Маршал одигра извонредно со 36 поени. За домаќините дебитираше Крис Мидлтон, кој заврши со 17 постигнати поени.
Портланд Трејл Блејзерс 121-112 Чикаго Булс
Портланд успеа да ја искористи кризата на Чикаго Булс и да слави на гостински терен. Џерами Грант со 27 поени беше лидер на Блејзерси, додека кај домаќините најефикасен беше Матас Бузелис со 20 поени. Булс сега имаат 11 последователни порази во февруари, израмнувајќи го третиот најдолг негативен низа во клупската историја.
Њу Орлеанс Пеликанс 129-118 Јута Џез
Садик Беј ја предводеше офанзивата на Пеликанс со фантастични 42 поени во победата над Јута. Беј беше речиси непогрешлив од поле (14/20), а голема поддршка доби од Зајон Вилијамсон кој додаде 20 поени. За Њу Орлеанс ова беше важен триумф, означен и со солидното издание на Деџунте Мареј кој запиша 17 поени и 9 асистенции во својот втор меч по камбекот од повредата.
Минесота Тимбервулвс 94-88 ЛА Клиперс
Ентони Едвардс со 31 поен, вклучувајќи ја клучната тројка во последната минута, ја донесе победата за Минесота. Лос Анџелес Клиперс имаа големи проблеми во нападот, постигнувајќи само 38 поени во првото полувреме, што е нивен сезонски минимум.
