Регуларниот дел од НБА сезоната влегува во самиот финиш, а синоќешната програма донесе директни битки за плејоф позициите на Истокот и продолжување на победничките низи на Западот.
Никс ја преживеаја посетата на Селтикс и го „бркаат“ второто место
Њујорк Никс славеа со 112-106 против Бостон Селтикс, со што останаа во игра за втората позиција на Истокот. Џош Харт одигра клучна улога со 26 поени (15 во последната четвртина), додека Џејлен Брансон додаде 25 поени и 10 асистенции.
Кај Бостон, Џејсон Тејтум постигна 24 поени во своето прво појавување во „Медисон Сквер Гарден“ по тешката повреда на ахиловата тетива минатата сезона. Никс сега заостануваат два натпревари зад Селтикс, а со оглед на тоа што го добија меѓусебниот дуел во сезоната (3-1), се надеваат на чудо во последните два натпревари.
Рапторс преку Мајами кон прв плејоф по 2022 година
Торонто Рапторс го совладаа Мајами Хит со 128-114 и се искачија на петтото место во Источната конференција. Брендон Инграм експлодираше со рекордни за него во оваа сезона 38 поени, додека Ар-Џеј Берет додаде 22. Мајами, кои се во евидентен пад на формата со 10 порази на последните 13 меча, беа предводени од Бам Адебајо (24 поени), но веќе е извесно дека патот до плејофот ќе мора да го бараат преку плеј-ин турнирот.
Леброн подобар од „десеткуваните“ Вориорс
Во натпревар кој помина без дуелот меѓу старите пријатели Џејмс и Кари, Лос Анџелес Лејкерс славеа во Сан Франциско против Голден Стејт со 119-103. Леброн Џејмс на 41-годишна возраст покажа зошто сè уште е еден од најдобрите, завршувајќи со 26 поени, 11 асистенции и 8 скокови.
Стеф Кари го пропушти натпреварот бидејќи тимот не сакаше да ризикува со неговото колено во „бек-ту-бек“ натпревари, па Вориорс (кои се зациментирани на 10. место) настапија со својата 41. различна стартна петорка оваа сезона.
Рокетс газат и без „брадата“, Филаделфија во шок по операцијата на Ембид
Хјустон Рокетс ја забележаа својата осма победа по ред, совладувајќи ја Филаделфија со 113-102. Кевин Дјурант беше лидер со 29 поени. Веста на денот во Тексас беше итното заминување на Џоел Ембид на операција на слепо црево, поради што 76-ките ќе бидат без својот најдобар играч на неодредено време. Тајриз Макси постигна 23 поени за Филаделфија, која сега падна во мртва трка со Шарлот за осмото место на Истокот.
Булси ги победија Визардс, Милер со рекорд на кариерата
Чикаго Булс лесно се справија со Вашингтон (119-108), комплетирајќи ја втората победа во два дена против истиот противник. Младиот Леонард Милер ги воодушеви фановите со рекордни во кариерата 26 поени и 11 скокови. Булси сега се израмнети со Милвоки на 11. место на Истокот, како тимови со најдобар скор меѓу оние кои веќе ги загубија шансите за плејоф.
Индијана ја прекина црната низа во Бруклин
Индијана Пејсерс славеа убедливо против Нетс со 123-94, прекинувајќи ја серијата од три порази. Оби Топин со 26 поени беше најефикасен во тимот на Индијана, кој настапи без главниот тренер Рик Карлајл (отсутен поради приватни причини). За Бруклин, Е.Џ. Лидел постигна 26 поени, но тоа не беше доволно да се спречи убедливиот пораз на домашен терен.
