Изминатата ноќ во најсилната кошаркарска лига донесе возбудливи натпревари и неколку импресивни индивидуални партии. Њујорк Никс ја прекинаа низата порази, додека Орландо Меџик ја продолжија својата доминација на Истокот.
Никс од -18 до убедлив триумф во Солт Лејк Сити
Њујорк Никс покажаа шампионски карактер на гостувањето кај Јута Џез, славејќи со 134-117 откако успеаја да надополнат огромна негатива. Јута започна фуриозно и водеше со 49-31 во втората четвртина, но „Никербокерси“ не паничеа.
Предводени од Џејлен Брансон (28 поени и 8 асистенции) и „џокерот“ од клупата Џордан Кларксон (27 поени), Никс направија клучна серија од 20-4 на преминот меѓу третиот и четвртиот период. Свој придонес дадоа и ОЏи Ануноби со 22 и Карл-Ентони Таунс со 21 поен. Кај Јута најдобар беше младиот Сенсаба со 29 поени, но повредата на Кионте Џорџ во третиот период ја „скрши“ играта на домаќините.
Десмонд Бејн го „запали“ Орландо, Меџик со петта победа по ред!
Орландо Меџик моментално е еден од „најжешките“ тимови во лигата, откако ја забележа петтата победа во низа совладувајќи го Кливленд со 128-122. Херој на вечерта беше Десмонд Бејн, кој постигна 35 поени, вклучувајќи ја клучната тројка на 17 секунди пред крајот додека паѓаше во аут.
Паоло Банкеро додаде 25 поени и 8 скока, додека кај Кливленд најефикасен беше ветеранот Џејмс Харден со 30 поени. Кавалирс успеаја да се вратат од двоцифрена негатива и да внесат драма, но Бејн беше немилосрден во финишот.
Пеликанс го „расипаа“ враќањето на Инграм во Њу Орлеанс
Брендон Инграм се врати во градот каде што помина шест сезони, но неговиот Торонто Рапторс претрпе пораз од Њу Орлеанс со 122-111. Иако Инграм стигна до јубилејни 11.000 поени во кариерата, домаќините беа подобри.
Треј Марфи III со 28 поени и Дежонте Мари со 27 го предводеа победничкиот тим. Мари изгледа одлично по враќањето од тешката повреда на Ахиловата тетива, додека Зајон Вилијамсон придонесе со 19 поени. Торонто по овој пораз падна на седмата позиција на Истокот.
