Претпоследниот ден од регуларниот дел на НБА сезоната донесе разврска на многу дилеми. Додека некои тимови ги зациментираа своите позиции, други испишаа нови страници во историските книги – некои по добро, а некои по лошо.
Пистонс чекорат кон историја, Хорнетс „заглавени“ во плеј-ин
Детроит Пистонс славеа против Шарлот со 118-100, предводени од Џејлен Дурен (20 поени). Со оваа победа, Детроит е на само еден триумф од својата прва сезона со 60 победи по цели 20 години. Од друга страна, овој пораз официјално ги зациментира Шарлот Хорнетс на позициите за плеј-ин турнирот. ЛаМело Бол постигна 27 поени, но тоа не беше доволно за „Стршлените“.
Визардс со најлош рекорд во историјата, Мајами по четврти пат во плеј-ин
Мајами Хит го прегази Вашингтон со 140-117, но вистинската приказна е кај домаќините. Вашингтон Визардс официјално го потврдија најлошиот скор во НБА (17-64) и станаа првиот тим во историјата кој загубил 64 натпревари во три последователни сезони. Кај Мајами, кои по четврти пат по ред ќе играат плеј-ин, блеснаа Фонтекио и Ларсон со по 24 поени, додека Адебајо доминираше со 20 поени, 11 скокови и 8 асистенции.
Никс ја „бетонираа“ тројката, Енјуноби загрижи со повреда
Њујорк Никс ја запишаа својата 13-та последователна победа над Торонто (112-95) и го осигураа третото место на Истокот. Џејлен Брансон (29 поени) и Карл-Ентони Таунс (22 поени, 10 скокови) беа премногу силни за Рапторс. Сепак, сенка на победата фрли повредата на ОГ Енјуноби, кој го повреди скочниот зглоб и не се врати во игра.
Бостон израмни НБА рекорд со 29 тројки!
Бостон Селтикс го демолираа Њу Орлеанс со 144-118 во натпревар кој влезе во историјата. Селтикс погодија неверојатни 29 тројки, со што го израмнија рекордот на НБА лигата. Сем Хаузер постигна 24 поени (8 тројки), а со оваа победа Бостон и официјално го потврди второто место на Истокот и ја освои Атлантик дивизијата.
Филаделфија се држи без Ембид, Индијана со втор најлош скор
Филаделфија 76ерс го совладаа Индијана Пејсерс со 118-105, предводени од извонредниот Тајрис Макси (32 поени). Сиксерси успеаја да ја задржат осмата позиција на Истокот пред последниот ден. Кај Пејсерс, кои по ланското финале сега паднаа на самото дно, најефикасен беше Џарас Вокер со 17 поени.
Хокс се „кралеви“ на Југоистокот, Кавс остануваат четврти
Атланта Хокс го декласираа Кливленд со 124-102 и ја освоија титулата во Југоисточната дивизија за првпат по 2021 година. Си-Џеј Меклум (29 поени) и Дајсон Даниелс (трипл-дабл: 13 поени, 12 асистенции, 10 скокови) беа клучни. Кливленд веќе знае дека во плејофот влегува како четврти носител на Истокот.
Рекордна ноќ за Еј-Џеј Грин во Милвоки
Милвоки Бакс го победија Бруклин со 125-108, а натпреварот го одбележа Еј-Џеј Грин. Тој постигна рекордни во кариерата 35 поени, погодувајќи дури 11 тројки, со што го собори клупскиот рекорд на Реј Ален и Дамијан Лилард. Ова беше емотивна ноќ во Милвоки, бидејќи Бакс ја завршуваат првата сезона со негативен скор по една деценија, додека шпекулациите за иднината на Јанис стануваат сè погласни.
Меџик ги сопнаа Булси и го напаѓаат шесттото место
Орландо Меџик славеа во Чикаго со 127-103, предводени од Франц Вагнер (25 поени). Со петтата победа во низа, Орландо се израмни со Торонто на шестото место. Чикаго, пак, стигна до бројката од 50 порази за првпат по седум години, среде хаос во управата и најавени откази.
Вембањама е „во игра“ за награди по доминацијата над Далас
Виктор Вембањама постигна 40 поени и 13 скокови во победата на Сан Антонио над Далас (139-120). Поважно од победата е што ова беше 65-ти натпревар за Вемби, со што тој официјално стана кандидат за сезонските награди, каде е апсолутен фаворит за Дефанзивец на годината. Кај Далас, дебитантот Купер Флег блесна со 33 поени.
Нагетс славеа со резервите, Тандер немоќни во Денвер
Денвер Нагетс и со „втора постава“ го совладаа Оклахома Сити со 127-107. Јонас Валанчиунас доминираше во рекетот со 23 поени и 17 скокови. Денвер ја запиша 11-та победа во низа и ја осигура предноста на домашен терен во првата рунда, останувајќи во игра за третото место.
Историја во Јута: Двајца играчи со трипл-дабл на ист меч!
Јута Џез го преслуша десеткуваниот Мемфис со 147-101. Овој натпревар е историски за „Џезерите“, бидејќи за првпат двајца нивни играчи остварија трипл-дабл на ист меч: Џон Кончар (11п, 11ск, 10ас) и Без Мбенг (27п, 11ск, 11ас).
Едвардс ја прекина серијата на Рокетс, Дјурант пред Карл Малоун
Минесота славеше во Хјустон со 136-132, прекинувајќи ја низата од осум победи на Рокетс. Ентони Едвардс погоди клучна тројка во финишот. Кај Хјустон, Кевин Дјурант постигна 33 поени и стана најстариот играч во историјата на НБА (37 години) кој стигнал до 2.000 поени во една сезона, надминувајќи го рекордот на Карл Малоун.
Кингс ги победија Вориорс во „финалето на резервите“
Сакраменто славеше против Голден Стејт со 124-118. Девин Картер постигна рекордни 29 поени. Вориорс го искористија мечот за воигрување на Кари и Порзингис (по 11 поени), пред нивниот настап во плеј-ин турнирот каде влегуваат како 10-ти носители.
Портланд во пол-позиција за осмото место
Трејл Блејзерс ги победија Клиперси со 116-97, со 35 поени на Дени Авдија. Доколку Портланд го победи Сакраменто во недела, ќе го осигура осмото место и дуел против Феникс Санс во плеј-ин турнирот.
Кралот Леброн: 28 поени и 12.000-та асистенција!
Лос Анџелес Лејкерс го совладаа Феникс со 101-73, а Леброн Џејмс повторно доминираше. Со 28 поени и 12 асистенции, Леброн стана само четвртиот играч во историјата на НБА кој ја пробил границата од 12.000 асистенции. Лејкерс со оваа победа осигураа предност на домашен терен во првата рунда на плејофот.
