Возбудувањата во најсилната кошаркарска лига во светот не стивнуваат. Изминатата ноќ донесе враќање на големите ѕвезди, потврда на доминацијата на фаворитите, но и историски момент кој ќе остане запишан во аналите на НБА лигата благодарение на едно 19-годишно момче.
Филаделфија моќна со Ембид, Едвардс непрепознатлив
Џоел Ембид се врати во составот на Филаделфија по кратката пауза поради болест и веднаш покажа зошто е клучен за „Сиксерси“. Во победата над Минесота Тимбервулфс од 115-103, Ембид забележа 19 поени, 13 скокови и 7 асистенции. Најефикасен беше Пол Џорџ со 23 поени.
Од друга страна, Минесота го претрпе вториот пораз во низа, а нивната прва ѕвезда Ентони Едвардс одигра еден од најлошите мечеви во кариерата, постигнувајќи само 8 поени со катастрофален шут од поле (3/15).
Бостон Селтикс не запираат: „Згазени“ и Милвоки Бакс
Бостон Селтикс продолжија со својата сурова доминација во Источната конференција, овојпат совладувајќи ги ослабените Милвоки Бакс со убедливи 133-101. „Келтите“ го решија прашањето на победникот уште во раната фаза, а нивното главно оружје повторно беше тандемот Браун-Тејтум. Џејлен Браун беше најефикасен со 26 постигнати поени, додека Џејсон Тејтум додаде 23 поени и 11 скокови. Тејтум беше на само една асистенција до втор последователен трипл-дабл учинок, иако целата последна четвртина ја преседе на клупата поради високата предност на својот тим.
Историски јубилеј за Њујорк Никс во „Чикаго“
Њујорк Никс приредија вистинска демонстрација на сила против Чикаго Булс, славејќи со огромни 40 поени разлика (136-96). Клучната фигура во овој триумф беше О-Џи Ануноби, кој блесна со 31 поен, погодувајќи дури седум тројки. Оваа победа е од историско значење за франшизата од Менхетен, бидејќи со неа Никс стигнаа до границата од 50 победи во сезоната. Ова е првпат по цели 32 години (уште од славната ера меѓу 1991 и 1994 година) тимот од „Медисон Сквер Гарден“ да успее да врзе три последователни сезони со најмалку 50 остварени триумфи.
Историја во Далас: Купер Флeг со 50 поени во пораз!
Натпреварот во Далас меѓу Маверикс и Орландо Меџик (127-138) ќе остане запаметен по неверојатниот Купер Флeг. Првиот пик на драфтот постигна 51 поен, од кои дури 24 во последната четвртина, станувајќи најмладиот играч во историјата на НБА со 50+ поени на еден меч (со само 19 години). Сепак, ниту овој историски учинок не го спаси Далас од 14-тиот пораз по ред на домашен терен, а тренерот на Мавс, Џејсон Кид, беше исклучен во последната четвртина по жесток протест кај судиите.
Шарлот со „дожд“ од тројки против Индијана
Вистинска „тројкашка“ редица видовме во Шарлот, каде домашните Хорнетс ја прегазија Индијана со 129-108. Клучот за триумфот беше неверојатниот шут од далечина – домаќините погодија дури 24 тројки, што е апсолутна доминација на теренот. Брендон Милер со 22 поени беше лидер во оваа победа, со која Шарлот ја потврди одличната форма, остварувајќи го осмиот триумф на последните 10 одиграни средби.
Атланта незапирлива против Нетс
Атланта Хокс продолжува да биде најжешкиот тим во Источната конференција по убедливото рушење на Бруклин Нетс со 141-107. Си-Џеј Меколум со 25 поени диктираше пеколно темпо кое „мрежичките“ не можеа да го следат. Со овој триумф, Атланта ја забележа својата четврта победа во низа, но импресивно звучи податокот дека славеле на дури 18 од последните 20 натпревари.
Кевин Дјурант и Хјустон го бркаат Денвер
Хјустон Рокетс го искористи домашниот терен за да ја продолжи својата победничка серија, совладувајќи ја Јута Џез со високи 140-106. Кевин Дурант уште еднаш покажа класа постигнувајќи 25 поени со одличен процент на шут, предводејќи го тимот до петтата победа по ред. Со овој успех, „ракетите“ сега се наоѓаат на само еден чекор зад Денвер во директната битка за четвртото место на Западот.
Берет и Рапторс до убедлив триумф во Мемфис
Во Мемфис, екипата на Торонто Рапторс одигра доминантен натпревар и славеше со убедливи 128-96. Канаѓанецот Р-Џеј Берет со 25 постигнати поени беше нерешлива енигма за одбраната на „гризлите“, кои го претрпеа осмиот пораз на последните девет меча. Оваа победа за Торонто е од витално значење во трката за избегнување на плеј-ин турнирот, бидејќи тимот останува во „мртва трка“ со Филаделфија за шестата позиција на Истокот.
