Клиперс го „разбија“ Бруклин со силно прво полувреме (Клиперс – Нетс 126-89 )
Кауај Ленард постигна 21 од своите 28 поени уште во првото полувреме, а Лос Анџелес Клиперс изградија огромна предност и убедливо го совладаа Бруклин Нетс. Домашниот тим веќе во втората четвртина стигна до +38, оставајќи без одговор гостинска екипа која продолжува со слободниот пад.
Џејмс Харден додаде 19 поени, Џон Колинс 18, а Џордан Милер 16, додека Ивица Зубац запиша дабл-дабл со 11 поени и 10 скока. Клиперс ја продолжија одличната форма со осма победа во последните девет натпревари. Бруклин, пак, шутираше катастрофални 34% од поле и дури 21% за три поени, со што го забележа четвртиот пораз по ред.
Кари ја предводеше одбранбената клиника на Вориорс во Минесота (Вориорс – Тимбервулвс 111-85)
Голден Стејт Вориорс ја продлабочија кризата на Минесота Тимбервулвс, славејќи убедливо со 111-85. Стеф Кари постигна 26 поени, додаде седум асистенции и беше клучен дел од тимската одбрана која украде дури 20 топки, што е сезонски рекорд за Вориорс.
Мозес Муди имаше 19 поени и осум скока, а Голден Стејт се доближи на само една и пол победа зад Минесота во борбата за седмото место на Западот.
Детроит не застана, Канингем диригираше против Кингс (Пистонс – Кингс 139-116)
Детроит Пистонс продолжуваат со импресивната сезона и со убедливи 139-116 ги совладаа Сакраменто Кингс. Кејд Канингем блескаше со 29 поени и 11 асистенции, водејќи го Детроит до петтата победа во последните шест натпревари.
Пистонс се лидери на Истокот со скор 33-11, додека Сакраменто потона на 12-35 и ја продолжи серијата од пет порази. Домантас Сабонис одигра солиден натпревар по враќањето од повреда, но тоа беше далеку од доволно.
Репторс го шокираа лидерот во Оклахома (Репторс – Тандер 103-101)
Торонто Репторс го пприредија изненадувањето на вечерта, победувајќи го НБА-лидерот Оклахома Сити Тандер со 103-101. Имануел Квикли запиша 23 поени и 11 скока, додека тимската игра на Репторс донесе четврта победа по ред.
Шај Гилџес-Александер постигна 24 поени и ја продолжи неверојатната серија од 117 натпревари со најмалку 20 поени, но овојпат тоа не беше доволно за победа.
Пеликанс преживеаја камбек и славеа во Сан Антонио (Пеликанс – Спарс 104-95)
Њу Орлеанс Пеликанс испуштија 20 поени предност, но во финишот сепак славеа против Сан Антонио Спарс со 104-95. Садик Беј и Зајон Вилијамсон забележаа по 24 поени и 10 скока.
Виктор Вембањама имаше 16 поени, 16 скока и четири блокади, но Спарс не успеаја да го комплетираат пресвртот по силната серија во четвртата четвртина.
Мајами сигурен против ослабен Феникс (Хит – Санс 111-102)
Мајами Хит ја заокружија успешната турнеја со победа од 111-102 над ослабените Феникс Санс. Бем Адебајо постигна 22 поени, а Хаиме Хакез Џуниор додаде 20 во уште едно контролирано издание на Хит.
Феникс настапи без Девин Букер и тоа јасно се почувствува со слабо шутирање и недостиг на креативност во нападот. Мајами ја заврши турнејата со скор 3-2 и ја потврди стабилната форма.
*НБА ги одложи мечевите во Милвоки и Мемфис поради снежната бура.
