Ненад Димитријевиќ ја игра кошарката на својот живот! Македонскиот репрезентативец беше апсолутен лидер на Баерн Минхен во третиот натпревар од финалната серија во германската ББЛ лига, носејќи ги Баварците до огромен „брејк“ на гостински терен против лутиот ривал Алба Берлин со резултат 83-91.
Со оваа исклучително важна победа среде главниот град пред речиси 9.000 навивачи, кошаркарскиот гигант од Минхен сега се наоѓа на само еден единствен чекор од освојување на шампионскиот трофеј.
Драма во „Шмелингхале“: Блокади, пресврти и роденденска тројка на Лучиќ
Натпреварот изобилуваше со физички контакти и вистинска рововска битка. Во втората четвртина, Габриел ја крена клупата на нозе со спектакуларна блокада над Робертс, по што следеше блескава серија од 8-0 иницирана од креативноста на Димитријевиќ, носејќи водство за Баерн од 39-30 (16-та минута). Сепак, Алба успеа преку брзи транзиции да се врати и на полувреме да замине со минимална негатива (43-40).
Второто полувреме донесе вистински трилер. По константните напади на Баерн преку Ајзеа Мајк, Алба возврати со силен удар и во 29-тата минута за првпат поведе (60-59). Радоста на домашните траеше кратко бидејќи Нилс Гифај со моќно забивање пред самиот звук на сирената ја врати предноста кај Баварците (61-60).
Нервите во последната четвртина беа доведени до максимум. На осум минути до крајот Гифај погоди важна тројка (69-66), но клучниот момент се случи на нешто повеќе од две минути пред крајот. Капитенот Владимир Лучиќ, токму на својот 37-ми роденден, погоди неверојатно тешка тројка за 80-73, што дефинитивно ги скрши надежите на Берлинците. Точка на натпреварот стави Холац со луда тројка од табла во последната минута, предизвикувајќи предвремено празнење на салата од страна на домашните фанови.
МВП перформанс на македонскиот плејмејкер
Главен архитект на овој голем брејк беше токму нашиот Нено. За нешто повеќе од 23 минути поминати на паркетот, Димитријевиќ испорача вистинска МВП-партија, завршувајќи како убедливо најдобар поентер на натпреварот. Тој забележа 19 поени, на кои додаде и 7 брилијантни асистенции, маестрално разигрувајќи ги своите соиграчи кога беше најпотребно. Неговата визија и сигурна реализација претставуваа нерешлива енигма за одбраната на берлинскиот тим.
Пешиќ горд на дефанзивата: „Ова беше нашата најдобра одбрана во серијата“
По натпреварот, тренерот на Баерн, Светислав Пешиќ, не го криеше задоволството од дефанзивниот пристап на својот тим.
„Сигурно можеме да играме уште подобра одбрана, но оваа вечерва беше нашата најдобра дефанзива досега во оваа серија. Ги натеравме на 18 грешки, имавме 12 украдени топки, а Алба ја сведовме на само 14 асистенции. Ако не сте будни против нив, ја губите контролата. Во нападот, секако ќе постигнеме 90 поени без разлика на сè, но важно е да ја повториме ваквата дефанзивна организација“, истакна Пешиќ.
Со слични размислувања се надоврза и Ајзеа Мајк, кој посочи на големиот влог: „Беше многу физички натпревар. Ова е финале и влогот е огромен. Сите знаевме дека оној што ќе загуби вечерва, во петок ќе биде притиснат до ѕид. Дадовме сè од себе за оваа победа и сакаме да ја затвориме серијата в петок“.
Тренерот на Алба Берлин, Педро Калес, спортски го призна поразот, потенцирајќи ги индивидуалните грешки на неговиот тим: „Агресивната одбрана на Баерн и нашите изгубени топки не ни дозволија да фатиме ритам. Направивме индивидуални дефанзивни грешки кои не смеете да си ги дозволите во едно финале. В петок мораме повторно да одиме до крајните граници пред нашите навивачи“.
Прва „меч-топка“ веќе в петок
Баерн Минхен максимално ја искористи шансата, го врати брејкот и сега ја има комплетната контрола во финалната серија. Следниот, четврти натпревар кој може да биде и решавачки за титулата, е закажан за в петок со почеток во 20:30 часот (пренос на Dyn и sportschau.de). Доколку Алба успее да се спаси и да избори мајсторица, решавачкиот петти меч ќе се одигра в недела во Минхен, во спектакуларниот нов „САП Гарден“.
