Македонскиот кошаркарски ас Ненад Димитријевиќ одигра уште еден натпревар за паметење во Евролигата, предводејќи го својот Баерн Минхен до голема победа над турскиот гигант Фенербахче со 85-76. Во преполната „САП Гарден“ арена, Нено беше најдобар стрелец и најзаслужен што германскиот тим ја прекина црната низа од осум последователни порази во меѓусебните дуели.
Нашиот плејмејкер го израмни својот рекорд на кариерата во Евролигата, постигнувајќи фантастични 22 поени. Димитријевиќ диригираше со нападот на Баерн во клучните моменти, покажувајќи зошто е еден од најдобрите организатори на играта во елитното натпреварување.
Баерн фуриозен на стартот, Нено сигурен во финишот
Баерн започна моќно и благодарение на серијата од 17-2 уште во првата четвртина создаде двоцифрена предност. Иако Фенербахче, предводен од Тарик Биберовиќ (21 поен), успеа да се врати во мечот и во самиот финиш да се доближи на само три поени негатива (79-76), избраниците на Светислав Пешиќ останаа присебни.
Клучниот момент го имаше Џастинијан Џесуп, кој на асистенција на Димитријевиќ погоди тројка од аголот со која ги реши сите дилеми околу победникот. Покрај нашиот репрезентативец, во тимот на Баерн се истакнаа и Џесуп со 16 и Андреас Обст со 14 поени.
Пешиќ му верува, Нено враќа со камата
Оваа победа е од огромно значење за самодовербата на тимот на Бајерн, кој сега има скор од 15 победи и 20 порази. За Нено Димитријевиќ, пак, ова е уште една потврда дека под водство на легендарниот Светислав Пешиќ го достигнува својот врв. Македонецот добива огромна минутажа и слобода во играта, а неговите партија се најдобра најава за она што го очекува во завршницата од сезоната.
