Кошаркарите на Црвена Звезда продолжуваат со фантастичните игри во Евролигата. Вечерва во Белград, српскиот и регионален шампион го совлада тимот на Хапоел Тел Авив со 87-75, со што стигна до својот петти последователен триумф во елитното натпреварување.
Маестрална последна четвртина за одлука
Иако натпреварот беше израмнет во поголемиот дел, клучниот момент се случи на самиот старт на последната четвртина. Избраниците на Јанис Сферопулос влегоа во фуриозна серија од 14-0, со која целосно го дезориентираа противникот и ја презедоа контролата врз резултатот. Колку беше доминантна одбраната на Белграѓани говори фактот што на Хапоел му дозволија да постигне само 6 поени во целиот последен период.
Најзаслужен за овој триумф беше Џордан Нвора, кој одигра клучна улога кога беше најпотребно. Тој постигна 22 поени, од кои дури 11 беа во одлучувачката четвртина. Одлична поддршка имаше во Џаред Батлер, кој додаде 17 поени, додека Коди Милер-Мекинтајер повторно ги влечеше конците во играта со 10 поени и 9 асистенции.
Криза во Тел Авив
Од друга страна, Хапоел Тел Авив продолжува да тоне во резултатска криза, бележејќи го третиот пораз по ред. Отсуството на нивната прва ѕвезда, Елајџа Брајант, е повеќе од очигледно во играта на израелскиот тим. Крис Џонс со 16 и Иш Вајнрајт со 15 поени беа единствените расположени поединци кај гостите, но тоа не беше доволно за да се запре расположената Звезда.
Со овој триумф, Црвена Звезда сега има скор од 16-10 и сериозно се етаблира во горниот дел од табелата, додека Хапоел со еден одигран натпревар помалку е на сооднос 16-9.
