Раководството на Ливерпул не губи време по разделбата со Арне Слот и веќе ги започна официјалните и напредни преговори со шпанскиот стратег Андони Ираола за преземање на менаџерската функција на „Енфилд“. По отказот кој во саботата му беше врачен на Слот, само една година откако го однесе клубот до премиерлигашката титула, 43-годишниот Ираола веднаш беше означен како најистакнат фаворит за негов наследник. Разговорите на големо се во тек, а со оглед на тоа што Баскиецот е силно мотивиран да го прифати овој голем предизвик, на Островот веќе постои огромно очекување за брза завршница на преговорите.
Враќање на препознатливиот „хеви-метал“ фудбал
Зад изборот на Ираола стои јасна и дефинирана стратегија на високите фигypи во Ливерпул. По заминувањето на Слот, челниците на клубот јасно ставија до знаење дека на тимот му е потребен менаџер кој ќе го врати агресивниот, итен и директен стил на игра со висок притисок на противничката половина.
Методите на Ираола совршено се вклопуваат во оваа визија, што најдобро се забележа преку неговата тригодишна извонредна работа на клупата на Борнмут. Шпанскиот стратег го привлече вниманието на европските гиганти со својот константен прогрес, откако во дебитантската сезона го предводеше тимот до 12-то место, а веќе следната година обезбеди скалило погоре и стабилно деветто место на табелата. Изминатава сезона ја заокружи на најубав можен начин, донесувајќи историско шестто место во Премиерлигата и обезбедувајќи го првиот пласман во Лигата на Европа во клупската историја.
Тактичкиот профил на Ираола се базира на брутален атлетицизам и колективен пресинг, каде од фудбалерите се бара носење одлуки во дел од секундата за да се задуши противничкиот напад уште во самиот зародиш, по што веднаш се тргнува во брза и директна транзиција кон голот.
Стари познаници и плановите за стручниот штаб
Клучна улога во целиот овој процес има спортскиот директор на Ливерпул, Ричард Хјуз. Токму Хјуз беше човекот кој го назначи Ираола за менаџер на Борнмут во летото 2023 година, па нивната одлична меѓусебна соработка сега е главниот адут за негово привлекување на „Енфилд“.
Дел од тековните преговори се однесуваат и на структурата на новиот стручен штаб. Ираола е решен со себе во Ливерпул да го донесе својот помошник од Борнмут, 38-годишниот Томи Елфик. За Елфик ова би било остварување на сонот бидејќи станува збор за доживотен навивач на Ливерпул, кој токму поради оваа потенцијална златна шанса минатата недела ја одби понудата да стане менаџер на Бристол Сити. Иако од Ливерпул сè уште немаат остварено формален контакт со Елфик, јасно е дека тој со задоволство би ја прифатил улогата.
Од друга страна, раководството на Ливерпул категорично ги демантираше шпекулациите на медиумите дека веќе контактирале со поранешните нивни играчи како Џејмс Милнер или Тијаго Алкантара за нивно вклучување во стручниот штаб, нагласувајќи дека допрва ќе се анализира кои позиции ќе треба дополнително да се пополнат.
