По заминувањето на Луис Хамилтон во Ферари, Џорџ Расел остана како столбот на кој Мерцедес ја гради својата иднина. И додека 2025 година помина во знакот на доминацијата на Мекларен и Ландо Норис, најавите за сезоната 2026 велат дека Мерцедес би можел да се врати таму каде што беше пред една деценија – на самиот врв.
„Овој болид не изгледа како промашување“
Тото Волф е познат по својата искреност, а според Расел, првичните импресии за новиот болид (W17) се повеќе од позитивни. По приватните тестови во Барселона минатата недела, Расел откри дека бројките од симулаторот конечно се совпаѓаат со реалноста на патеката, нешто што не се случило во Мерцедес уште од 2021 година.
Мерцедес комплетираше неверојатни 500 кругови во три дена, што е јасен сигнал за сигурноста на новата единица. „Се чувствувам 100% подготвен да се борам за титулата“, изјави Расел, кој веќе влегува во својата петта сезона со тимот.
Моторната револуција: Мерцедес повторно најде „дупка“ во правилата?
Најголемата прашина во падокот се крена околу новиот мотор на Мерцедес. Се шпекулира дека тимот на Тото Волф, заедно со Ред Бул, пронашол начин како да извлече повеќе коњски сили преку повисок степен на компресија во цилиндрите додека моторот е загреан.
Иако правилата наложуваат сооднос од 16:1, ривалите се жалат дека Мерцедес на патеката достигнува 18:1, што им дава огромна предност. Волф останува смирен и тврди дека сè е легално, но ФИА веќе закажа технички состаноци за да ја испита оваа „сива зона“. Дали сме сведоци на реприза од 2014 година кога Мерцедес имаше толку моќен мотор што никој не можеше да му се приближи?
Пресметка со Верстапен: „Сакам борба лице в лице“
Расел не крие дека неговата најголема желба е директен дуел со Макс Верстапен. Иако Расел минатата сезона победи на неколку трки кога болидот му го дозволи тоа, сега сака цела сезона во која ќе се бори за бодови „гради во гради“ со четирикратниот шампион.
Со Кими Антонели како нов тимски колега, Расел го има статусот на „прв возач“ и поддршката од целиот тим. „Џорџ е еден од најдобрите на гридот и заслужува да биде фаворит“, смета Тото Волф.
