Екипата на ГРК Охрид очигледно нема намера да биде само симпатичен учесник во македонската ракометна Суперлига. Проектот на „Гладијаторите“, предводен од српскиот стратег Борис Ројевиќ, зема сериозен залет, а најновата информација која кружи во ракометните кулоари (иако сè уште непотврдена од клубот) најавува вистински тектонски пореметувања во македонскиот ракомет.
Според нашите добро упатени извори, Охрид е пред потпис со унгарскиот репрезентативец и поранешен ракометар на гигантите ПСЖ и Келце, Доминик Мате!
Кој е всушност Доминик Мате?
За оние кои помалку го следат европскиот ракомет, станува збор за 25-годишен десен бек, висок 201 сантиметар, кој важеше за еден од најголемите европски таленти на својата генерација. Своето деби за сениорската репрезентација на Унгарија го имаше на само 19 години (на СП 2019), по што неговата кариера тргна по нагорна линија.
По блескавите настапи за норвешки Елверум, тој заработи трансфер во богатиот ПСЖ каде настапуваше од 2022 до 2024 година. Неговиот потенцијал го забележа и Талант Душебаев, па Мате потпиша тригодишен договор (2024-2027) со полски Келце, каде требаше да биде директна замена за Алекс Душебаев.
Проклетството на повредите и камбекот
Сепак, тука започнува потешкиот дел од неговата приказна. Тешката повреда на коленото заработена на ЕУРО 2024 го оддалечи од терените цели 11 месеци, поради што трансферот во Келце пропадна. За да ја спаси кариерата и да ја врати самодовербата, Мате се врати во „својот“ Елверум, каде сезонава игра одлично во Европската лига на ЕХФ (29 постигнати голови).
Што значи ова за Охрид?
Ако овој трансфер се реализира, тоа ќе биде јасен сигнал дека Охрид не се шегува. Донесувањето на играч со вакво педигре (и покрај историјата со повреди) покажува дека клубот од покрај езерото има амбиции да ја разбие големата тројка (Вардар, Пелистер, Алкалоид) и да атакува на самиот врв. Мате би ја делел минутажата на десната бековска позиција со домашните сили, Томислав Јагуриновски и Давид Савревски.
Охриѓани сезонава веќе покажаа заби победувајќи ги Пелистер и Алкалоид во „Билјанини Извори“, а ги очекува и историско четвртфинале во ЕХФ Европскиот Куп против грчки Олимпијакос.
Останува да видиме кога (и дали) управата на Охрид официјално ќе ја активира оваа трансфер-бомба. Едно е сигурно, македонскиот клупски ракомет одамна не бил поинтересен!
