Иако зимскиот преоден рок е во полн ек, „гладијаторите“ од Охрид изгледа веќе го кројат тимот за следната сезона. Низ ракометните кулоари сè погласно се зборува дека ГРК Охрид е пред финализирање на уште еден сериозен трансфер, овојпат на голманската позиција.
Станува збор за Дино Славиќ, актуелниот чувар на мрежата на францускиот Лимож и хрватски репрезентативец.
Импресионираше против Македонија, заврши во бележникот на Охрид?
Тајмингот на овие шпекулации не е случаен. Славиќ пред само десетина дена имаше фантастичен настап на „Кроација Купот“ во Пореч, токму против репрезентацијата на Македонија. Тој собра 15тина интервенции, практично сам ја победи нашата селекција и си обезбеди место во хрватскиот тим за претстојното Европско првенство.
Информациите велат дека преговорите се во напредна фаза, а планот е 33-годишниот голман да пристигне во Охрид на лето 2026 година и да остане најмалку две сезони.
Искуство од Лига на Шампиони
Ако се реализира овој трансфер, Охрид ќе добие голман со сериозно педигре. Славиќ, покрај во Лимож, има брането и за ППД Загреб во Лигата на шампионите, како и за шпанскиот Адемар Леон.
Со ова, „хрватската колонија“ во Охрид би се зголемила дополнително. Во тимот веќе се (или ќе бидат) Кристијан Пилиповиќ (кој настапува за Австрија, но е со хрватско потекло), Ловро Јотиќ, а најавено е и доаѓањето на Анте Иванковиќ.
Дали Охрид ќе го има најсилниот голмански тандем во лигата со Пилиповиќ и Славиќ, останува да видиме, но амбициите на клубот очигледно се многу повисоки од само пласман во Европа.
