Ракометарите на ГРК Охрид ја отворија пролетната полусезона во Суперлигата токму онака како што посакуваа нивните навивачи – со доминантна партија и висока победа. Во рамките на 19-то коло, избраниците на Борис Ројевиќ го совладаа составот на Прилеп со финални 28:17, најавувајќи дека се подготвени за „пеколниот“ февруари кој ги очекува и на домашна и на европска сцена.
Капитенот Ојлески немилосрден, Пилиповиќ „спушти ролетна“
Натпреварот започна со цврста одбрана на двете страни, а Охрид на пауза замина со предност од три гола (14:11). Сепак, вистинската демонстрација на сила се случи во вториот дел. Домашните ракометари го диктираа темпото, а одбраната беше на врвно ниво, дозволувајќи му на противникот само 6 гола во вторите 30 минути.
Прво име на средбата беше капитенот Гоце Ојлески, кој ја полнеше мрежата на Прилепчани од сите позиции и заврши со 9 постигнати гола. Голема поддршка имаше од голманот Градимир Пилиповиќ, кој не само што запиша 12 одбрани, туку успеа и самиот да се запише во листата на стрелци.
Деби на Борозан и сигурна ротација
Овој натпревар беше и можност за деби на звучното засилување Вуко Борозан, кој својот престој во Охрид го започна со два гола и покажа дека ќе биде огромно засилување за „сино-белите“. Тренерот Ројевиќ им даде шанса на речиси сите ракометари, а стрелци беа и Стрмљан (3), Јагуриноски (2), Петриќ (2), Саврески (2) и останатите.
Со оваа победа, Охрид го зацврстува своето трето место на табелата и со голема доза на самодоверба се подготвува за претстојните предизвици во ЕХФ Европскиот куп.
