Италија е подготвена за најголемиот зимски спектакл, а очите на светот се вперени кон Милано и Кортина. На овогодинешните Олимписки игри учествуваат околу 2.900 спортисти од над 90 земји, но само неколку имиња имаат тежина на вистински глобални икони.
Линдзи Вон и Микаела Шифрин: Кралиците на патеките
Скијачкиот свет е во исчекување на невозможен камбек. Легендарната Линдзи Вон (41) само пет дена пред спустот во Кортина ги скина предните вкрстени лигаменти на левото колено. И покрај тешката повреда и претходната операција за замена на десното колено, ветеранката е решена да се појави на стартната позиција на својата петта Олимпијада.
Од друга страна, Микаела Шифрин (30) во Италија доаѓа како најдобрата на сите времиња. Со рекордни 108 победи во Светскиот куп и две олимписки злата, Шифрин бара „мир“ со Игрите по разочарувањата во Пекинг и личните трагедии со кои се соочуваше изминативе години.
Илја Малинин и Максим Наумов: Емоции и рекорди на мразот
Американското уметничко лизгање има два силни адути со неверојатни приказни. Илја Малинин (21), познат како „Богот на четворните скокови“, е единствениот кој некогаш извел четворен Аксел. Како светски првак, тој е апсолутен фаворит за златото.
Неговиот колега Максим Наумов (24) дебитира на Олимпијадата под тешки околности. Неговите родители, поранешни светски прваци во двојки, загинаа во авионска несреќа минатата година. Неговото појавување на мразот во Италија ќе биде исполнување на нивниот последен заеднички сон.
Ајлин Гу и Клои Ким: Иконите на новата генерација
Кинеската хероина Ајлин Гу (22) повторно е во центарот на вниманието. Скијачката која студира квантна физика на Стенфорд и доминира на модните писти во Милано, во Италија ќе се обиде да ги одбрани своите злата во „Big Air“ и „Halfpipe“.
Сличен предизвик има и сноубордерката Клои Ким (25). И покрај дислокацијата на рамото на почетокот на годинава, Американката атакува на трето последователно злато, подвиг кој досега не го направила ниту една жена во нејзината дисциплина.
НХЛ ѕвездите се враќаат во игра
По пауза од 12 години (последен пат во Сочи 2014), најдобрите хокеари од НХЛ лигата повторно се дел од Олимписките игри. Ова е огромен поттик за репрезентацијата на САД, која по неколку неуспешни турнири, сега со своите најголеми ѕвезди ќе се обиде да го симне Финска од тронот.
Историја во најава: Лукас Братен и Аријана Фонтана
Скијачот Лукас Пињеиро Братен (25) може да стане првиот спортист што ќе освои медал за Бразил на Зимски олимписки игри. Роден во Норвешка, Братен реши да настапува за татковината на својата мајка, носејќи сосема нова енергија во алпското скијање.
Домаќините, пак, најмногу очекуваат од својата легенда Аријана Фонтана (35). Со 11 олимписки медали зад себе, таа ќе го носи италијанското знаме на „Сан Сиро“ и ќе се обиде да освои медали во две различни дисциплини – брзо лизгање на кратки и на долги патеки.
