Зимските олимписки игри во Милано-Кортина 2026 се соочуваат со неочекуван технички проблем кој ги фрли во сенка спортските успеси на дел од атлетите. Имено, голем број олимпијци се пожалија дека нивните медали се откачуваат од лентите или буквално се распаѓаат по само неколку дена, што ги принуди организаторите на итна реакција.
Скокањето од радост е „забрането“
Проблемот прва го забележа американската скијачка Бризи Џонсон, која по освојувањето на златото во спуст, забележала дека нејзиниот медал се откачил додека возбудено скокала за време на прославата. Слична судбина имаа и германските биатлонци, кои дури објавија видео на социјалните мрежи како бронзата на Јустус Стрелов едноставно паѓа од лентата.
Портпаролот на организацискиот комитет, Лука Казаса, потврди дека „ограничен број медали“ покажале дефекти. Тој изјави дека веќе работат со италијанската ковачница на пари (Istituto Poligrafico e Zecca dello Stato), која е одговорна за изработката, за да се најде трајно решение. Како мерка на претпазливост, некои од веќе доделените медали ќе бидат повлечени за проверка и зацврстување.
Атлетите сакаат поправка, а не замена
Интересно е што некои спортисти, како Џонсон, веќе добија нови, заменски медали, но не се целосно задоволни. Американката изјави дека би претпочитала нејзиниот оригинален медал да биде поправен бидејќи новиот ги нема автентичните гравури и едноставно „не е оној истиот“ што го добила на подиумот.
Од италијанската ковачница најавија дека секој атлет кој има проблем со механизмот на лентата може да го врати медалот на бесплатна поправка, ветувајќи дека во иднина сите одличја ќе бидат со „360 степени“ издржливост за да го издржат дури и најентузијастичното славење.
Italian Olympic medals break down shortly after ceremonies.
— Jungle Journey (@JnglJourney) February 10, 2026
Design flaw or a consequence of cheaping out? pic.twitter.com/SKTMzFprAv
