Двата денешни натпревари во Првата македонска фудбалска лига понудија две сосема различни лица на нашиот фудбал. Во Битола, Пелистер и Тиквеш уште еднаш докажаа зошто се најнеефикасните екипи во лигата, одигрувајќи натпревар без голови (0-0) кој беше мачен за гледање, со повеќе тактизирање и грешки отколку вистински фудбал.
За разлика од “празниот бунар” под Тумбе Кафе, во Струга имаше сè што може да понуди еден дерби натпревар. Струга Трим Лум покажа шампионски карактер и со играч помалку во второто полувреме го совлада Шкупи со 2-1. Херој на натпреварот беше незапирливиот Басиру Компаоре, кој со два гола, од кои едниот од пенал, стигна до својот 11-ти гол сезонава и го врати својот тим на лидерската позиција на табелата.
