Избраниците на Кирил Лазаров влегоа во натпреварот со храброст, но и со видни промени во составот. Надвор од протоколот останаа најискусните Никола Митревски и Жарко Пешевски поради ситни проблеми со повреди, со што селекторот јасно стави до знаење дека ќе им даде шанса на помладите сили против најсилниот можен ривал.
Техничките грешки – клучниот фактор на стартот
Иако Македонија имаше свои добри моменти, клучот за високиот пораз лежи во деветте технички грешки кои можеби не беа премногу, но се случуваа во најлошите можни моменти, токму кога „црвено-жолтите“ успеваа да воспостават ритам и да ја намалат негативата, особено на стартот на натпреварот кога токму поради неколку наши грешки Данците се „одлепија“. Данската машина, предводена од Питлик и Гидсел, ваквите подароци ги претвораше во лесни голови од контранапад за само неколку секунди.
Борбен прв дел и „цепелин“ за мелем
По почетниот грч и водството на Данска од 8:3, Македонија заигра поангажирано. Томовски со неколку одбрани и расположениот Мартин Серафимов успеаја да ја вратат неизвесноста. Токму Серафимов го постигна најубавиот гол на мечот со ефектен „цепелин“ за 13:9, момент кој го принуди Николај Јакобсен да побара тајмаут. На одмор се замина со подносливи 17:12.
Доминација на домаќинот во продолжението
Сепак, надежта за поизвесна завршница згасна на почетокот на вториот дел. Данска влезе со неверојатна енергија, а Емил Нилсен на голот беше несовладлив. Во 44-тата минута, домаќинот првпат отиде на двоцифрена предност (27:17), по што натпреварот влезе во рутинска завршница во која двајцата тренери им дадоа шанса на сите ракометари од ростерот.
Најефикасни кај Македонија:
- Мартин Серафимов: 6 гола
- Филип Кузмановски: 4 гола
- Марко Митев: 4 гола
Кај Данците доминираа Питлик со 9 и Гидсел со 8 погодоци.
Шансата се бара против Португалија
Овој пораз беше очекуван со оглед на разликата во квалитет, но за Македонија вистинскиот турнир започнува в недела. Следниот предизвик е репрезентацијата на Португалија (18:00 часот), противник кој денеска постигна рекордни 40 гола против Романија. За позитивен резултат таму, ќе мора драстично да се намали бројот на продадени топки.
