Најдобриот стрелец во НБА лигата и првата ѕвезда на Лос Анџелес Лејкерс, Лука Дончиќ, нема да настапи на следниот натпревар против Вашингтон Визардс. Лигата официјално го суспендираше Словенецот на еден натпревар поради насобрани 16 технички грешки во тековната сезона.
Оваа автоматска суспензија доаѓа по инцидентот на натпреварот против Бруклин Нетс, каде Дончиќ ја заработи кобната 16-та „техничка“ по еден дуел со Зиаер Вилијамс.
Инцидентот во Бруклин: Туркање со „жешки глави“
Контроверзниот момент се случи во третата четвртина откако на Дончиќ му беше досуден офанзивен прекршок. Младиот кошаркар на Бруклин, Вилијамс, реши провокативно да прослави пред лицето на Лука, на што Словенецот одговори со туркање. По прегледувањето на снимката, судиите доделија технички грешки на двајцата играчи.
„Ништо не кажав, само сакав да заминам оттаму. Судиите рекоа дека моето туркање било претерано, што очигледно не е вистина. Не знам што друго да кажам“, изјави разочараниот Дончиќ по мечот.
Тренерот на Лејкерси, Џеј-Џеј Редик, најави жалба до лигата за оваа одлука, но тешко е да се верува дека НБА ќе ја промени одлуката пред дуелот со Вашингтон.
The sequence that led to Luka Doncic's 16th technical foul:pic.twitter.com/vkOKgd9JCx
— Underdog NBA (@UnderdogNBA) March 28, 2026
Трка со времето за индивидуалните награди
Оваа суспензија носи и дополнителен притисок за Дончиќ во борбата за МВП признанието и останатите индивидуални награди. Ова ќе биде негов 13-ти пропуштен натпревар сезонава. Според новите правила на НБА, играчот мора да настапи на најмалку 65 натпревари за да биде во конкуренција за награди. Тоа значи дека Лука мора да игра на најмалку три од преостанатите седум натпревари на Лејкерси до крајот на регуларниот дел.
Одмор во вистински момент?
Иако суспензијата е удар за тимот, таа доаѓа во момент кога Дончиќ се жали на болки во левата задна ложа. По напорниот распоред и серијата од 20 последователни мечеви по Ол-стар паузата (во кои просечно бележеше по 35.5 поени), овој принуден одмор може да му помогне на Словенецот да ги „наполни батериите“ пред клучните битки во плејофот.
Лејкерси моментално се наоѓаат во одлична форма со 11 победи на последните 12 натпревари и се позиционирани на третото место на Западот. Без Лука, одговорноста против „волшебниците“ ќе падне на плеќите на Леброн Џејмс и Остин Ривс.
