Зимските олимписки игри во Милано и Кортина го добија својот прв херој. Швајцарскиот скијач Франјо фон Алмен ја потврди својата доминантна форма од Светскиот куп и се искачи на највисокото скалило на подиумот во дисциплината спуст, освојувајќи го првото злато на овие Игри.
На легендарната и исклучително тешка патека „Стелвио“ во Бормио, Фон Алмен извозе трка за анализи. Со време од 1:51.61, тој беше недостижен за конкуренцијата, оставајќи го својот поискусен колега Марко Одермат зад себе со огромна предност од 0.70 секунди. Ова злато е само круна на една неверојатна сезона за младиот Швајцарец, кој претходно победи и во Кранс Монтана.
Италјанско славје на домашен терен
Додека златото замина за Швајцарија, домашната публика имаше многу причини за радост. Сребрениот медал го освои младиот Џовани Францони, кој заостана само 0.20 секунди зад победникот. За Францони ова е прв олимписки медал на неговиот дебитантски настап, со што само ја потврди својата класа.
Подиумот го комплетираше легендарниот Доминик Париз. Искусниот Италијанец, кој со години доминира на оваа патека во Светскиот куп, на своите петти Олимписки игри конечно дојде до посакуваниот медал пред домашните навивачи, освојувајќи го бронзеното одличје.
„Ова изгледа како филм“
Новиот олимписки шампион не го криеше изненадувањето од сопствениот резултат:
„Не можам со зборови да ви опишам што значи ова за мене – се чувствувам како во филм! Тајната? Се обидов да уживам во скијањето. Бев многу релаксиран утрово, се обидов да ги спојам сите коцки и едноставно да се забавувам на патеката. Времето ми покажа дека ова беше навистина добро возење, а не само добар претчувство“, изјави Фон Алмен по триумфот.
Интересно е што Фон Алмен и Францони го повторија нивниот дуел од Светското јуниорско првенство во 2022 година, кога двајцата исто така беа на првите две места, но тогаш со обратен редослед.
Возбудата на Игрите продолжува веќе утре, кога во Кортина д’Ампецо започнува женската конкуренција со трката во спуст.
