Екипата на Реал Мадрид тргна со победа во четвртфиналната серија од Евролигата, откако во првиот натпревар во шпанскиот главен град го совлада дебитантот Хапоел Тел Авив со 86:82. Иако домаќините доминираа во поголемиот дел од мечот, сепак мораа да се борат до последната секунда за да го одбранат домашниот терен во оваа серија.
Доминација на „кралевите“ и историски рекорд на Отуру
„Кралевите“ уште од самиот старт наметнаа силно темпо и ја добија првата четвртина со 27:18, за пред паузата таа предност да достигне убедливи 46:26. Факту Кампацо беше незапирлив во редовите на Реал, завршувајќи го мечот со 21 поен, додека поддршка доби од Треј Лајлс (13), Марио Хезоња (11) и Габриел Дек (10).
Од друга страна, Хапоел и покрај поразот покажа зошто е во плејофот. Антонио Блејкни постигна 25 поени, додека Ден Отуру оствари учинок за историја. Со своите 20 поени и неверојатни 17 скокови, Отуру постави нов рекорд во историјата на плејофот во Евролигата според бројот на скокови на еден натпревар.
Драматичен финиш во Мадрид
Иако се чинеше дека Реал лесно ќе стигне до триумф, гостите од Израел направија серија во последната четвртина. Со двете врзани тројки на Блејкни, Хапоел се доближи на само четири поени негатива во финишот. Сепак, во клучните моменти, гостинските кошаркари промашија трипати во обидите за три поени, што му овозможи на Реал да ја запише својата 18-та победа дома во вкупно 19 одиграни натпревари оваа сезона.
Вториот натпревар од серијата се игра веќе во петок, повторно во Мадрид.
