Светот на Формула 1 официјално влезе во новата ера. Во срцето на американската автомобилска индустрија, на централната станица во Детроит, Оракл Ред Бул Рејсинг (Oracle Red Bull Racing) го претстави новиот болид RB22 за сезоната 2026.
Ова не е само уште една промоција на болид. Ова е почеток на историско поглавје во кое тимот од Милтон Кејнс за првпат ќе се натпреварува со сопствен погонски агрегат, развиен во партнерство со гигантот Форд.
На настанот присуствуваа ѕвездата на тимот Макс Верстапен, новиот тимски колега Исак Хаџар, како и тимскиот шеф Лоран Мекис.
A fresh coat of paint for a brand-new era 🎨@FordRacing || #RedBullRacing pic.twitter.com/C4obLVXHI4
— Oracle Red Bull Racing (@redbullracing) January 16, 2026
Враќање кон корените: Сјаен финиш и ретро вибрации
Највидливата промена кај новиот RB22 е дизајнот. По една деценија доминација на мат-боите, Ред Бул се враќа на „глоси“ (сјаен) финиш, инспириран од болидот со кој тимот дебитираше во Формула 1 во 2005 година.
Новата „тркачка сина“ боја е надополнета со бели акценти и логото на Ford Racing, кое гордо стои на задното крило и на „хало“ заштитата.
„Ми се допаѓа сјајот. Ми се допаѓа сината боја, тоа е мојата омилена. Исто така, ми се допаѓа што се вратија контурите на логото со виножито. Изгледа многу посвежо“, изјави четирикратниот светски првак Макс Верстапен.
Техничка револуција: Предизвикот на 2026
Сезоната 2026 носи најголеми промени во правилата во историјата на спортот. Новите погонски единици ќе имаат сооднос од речиси 50-50 помеѓу моторот со внатрешно согорување и електричната енергија, користејќи целосно одржливи горива.
Ред Бул влегува во оваа битка како нов производител на мотори, предизвикувајќи ги етаблираните Мерцедес, Ферари и Хонда.
Тимскиот шеф Лоран Мекис беше реален во очекувањата:
„Би било наивно да мислиме дека веднаш ќе бидеме на нивото на конкурентите кои го прават ова 90 години. Знаеме дека ќе имаме тешкотии, главоболки и непроспиени ноќи, но веруваме дека на крајот ќе излеземе како победници“.
Спектакл на небото и земјата
Промоцијата во Детроит вклучуваше и спектакуларно видео во кое чешкиот пилот Мартин Шонка со својот авион ги „открива“ новите бои на тимот.
Новиот тандем: Верстапен и Хаџар
Покрај Верстапен, во кокпитот на вториот болид ќе седне младиот Французин Исак Хаџар (21), кој доби промоција од сестринскиот тим (Racing Bulls) по импресивната дебитантска сезона.
„Привилегија е да се биде дел од овој тим и да се вози покрај Макс. Едвај чекам да видам како болидот ќе изгледа под рефлекторите на ноќните трки“, изјави Хаџар.
Првиот тест за новиот болид и мотор ќе биде на патеката во Барселона кон крајот на овој месец, пред сезоната официјално да стартува во Мелбурн на 6-ти март.
