Бурата по вчерашното дерби во Охрид не стивнува. Ракометниот клуб Алкалоид преку официјално соопштение ја информираше јавноста дека до надлежните органи на Ракометната федерација на Македонија (РФМ) е поднесена официјална жалба поради „сериозни судиски пропусти и крајно неконзистентно судење“ на натпреварот од второто коло во плеј-офот на Суперлигата, кој заврши со резултат 27:27.
Скопскиот клуб отворено го изразува своето незадоволство од арбитражата на судиската двојка Виктор Начевски и Даниело Божиновски, сметајќи дека нивните одлуки директно влијаеле на конечниот исход на ова важно дерби.
Минов: Судењето беше лошо во текот на целиот меч
Претседателот на РК Алкалоид, Горан Минов, во соопштението истакна дека натпреварот можел да се прекрши во која било фаза, особено во финишот кога на домаќините им беше дозволен напад од дури 52 секунди во последната минута.
„Сметаме дека РК Алкалоид е драстично оштетен со катастрофалното судење на судиската двојка Виктор Начевски и Даниело Божиновски. Судењето беше лошо во текот на целиот меч, критериумите не беа изедначени, а во неколку наврати беа донесени одлуки на штета на РК Алкалоид за кои сметаме дека директно влијаеја на конечниот исход на дербито,“ изјави Минов.
РК Алкалоид потенцира дека натпреварите од вакво значење и резултатска тежина бараат највисок степен на професионалност и изедначен критериум, нешто што според нив недостасувало во Охрид. Клубот апелира до РФМ детално, стручно и одговорно да ја разгледа жалбата и да постапи без калкулации.
Реакции и обвинувања на социјалните мрежи
Соопштението на Алкалоид предизвика лавина од реакции. Навивачите на скопскиот тим ги поддржуваат обвинувањата, истакнувајќи го нерамноправниот критериум при доделувањето на црвените картони и исклучувањата, како и фамозниот последен напад од една минута без подигната рака за пасивна игра.
Дополнително, низ коментарите се провлекуваат и обвинувања за неспортско однесување на дел од домашната публика и официјални лица од ГРК Охрид кон тренерот на Алкалоид, Кирил Лазаров.
Останува да видиме каков ќе биде одговорот и евентуалните санкции од страна на Ракометната федерација на Македонија.
