Пари Сен Жермен направи уште еден сигурен чекор кон одбрана на шампионската титула во француската Лига 1. Во натпревар од 28. коло одигран на „Паркот на принцовите“, избраниците на Луис Енрике го совладаа жилавиот Тулуз со 3:1, потврдувајќи ја својата доминација во домашното првенство.
Дембеле го отвори шоуто, Тулуз брзо возврати
ПСЖ имаше апсолутна контрола на топката од самиот почеток (речиси 72% посед на крајот од мечот), но Тулуз добро се бранеше се до средината на првото полувреме. Во 23. минута, Усман Дембеле покажа дел од својата магија и со одличен удар со левата нога го отвори резултатот.
Радоста на домашните траеше кратко. Само четири минути подоцна (27′), по корнер кој го изведе Џибрил Сидибе, дефанзивецот Расмус Николаисен највисоко скокна и со глава го матираше Сафонов за 1:1.
Сепак, класата на ПСЖ излезе на виделина пред крајот на полувремето. Овојпат, Квича Кварацхелија (кој одигра одличен меч) асистираше, а Усман Дембеле од непосредна близина го постигна својот втор гол на натпреварот во 33. минута за ново водство на „Светците“ (2:1).
Рутина во вториот дел и печат на Рамос
Во второто полувреме, ПСЖ рутински ја одржуваше предноста, не дозволувајќи му на Тулуз да креира посериозни шанси за израмнување (гостите имаа само еден удар во рамките на голот на целиот натпревар).
Точка на натпреварот стави резервистот Гонсало Рамос во втората минута од судиското надополнување (90+2′), кога со прецизен удар од надвор од шеснаесетникот ги постави конечните 3:1 по асистенција на Нуно Мендеш.
Со оваа победа, ПСЖ стигна до бројката од 66 бодови на врвот на табелата и направи притисок врз второпласираниот Ленс (59 бодови, натпревар помалку). Од друга страна, Тулуз останува на безбедната 9-та позиција со 37 бодови.
