Откако по пауза од шест години ја врати шампионската круна во своите витрини, ФК Вардар влегува во новата натпреварувачка сезона предводен од нов предводник на стручниот штаб, Аргентинецот Кристијан Фабијани. Наследникот на Гоце Седлоски пред себе ја има тешката задача да ја одбрани неодамна освоената титула, а и да ја нападне двојната круна. Со таа цел, веќе комплетираше својот стручен штаб.
Станува збор за спој на луѓе кои веќе добро ја познаваат клупската култура и повратници со богато интернационално искуство.
Матија Мирков: Лојалност и континуитет
Прв асистент во стручниот штаб на Фабијани ќе биде Матија Мирков. Овој 47-годишен стручњак останува во таборот на „црвено-црните“ и по заминувањето на Седлоски, што значи дека сезоната која следи ќе биде негова трета по ред во клубот. Неговата континуирана работа со играчите и познавањето на домашната лига се очекува да му бидат од непроценливо значење на новиот аргентински стратег. Мирков претходно долги години работеше и во Шкупи и Металург, каде градеше искуство како помошник тренер.
Марјан Герасимовски: Шампионски менталитет со богато резиме
Улогата на втор асистент му е доделена на 53-годишниот Марјан Герасимовски. Станува збор за поранешен фудбалер кој како централен бек го носеше дресот на Вардар во сезоната 1997/98, пред да оствари импресивна интернационална кариера. Герасимовски настапуваше за гиганти како белградски Партизан и Легија Варшава, со која успеа да стане шампион на Полска. Во националниот дрес на Македонија забележа 10 настапи.
Во својата тренерска кариера работеше во Борец Велес и Металург, а сега се враќа во Вардар за да го пренесе својот шампионски менталитет како дел од новата генерација.
Велковски за голманите, Далип за физичката доминација
За развојот на чуварите на мрежата ќе биде задолжен Методија Велковски. Иако има само 26 години, актуелниот трет голман на тимот, кој пристигна од Силекс пред две години, сега ја презема одговорната улога на тренер на голманите. Неговата младост во стручниот штаб е несекојдневен потег, но клубот очигледно има огромна доверба во неговите аналитички и педагошки способности.
Кога е во прашање физичката подготвеност, тука е веќе најавеното враќање на Метин Далип. Еден од најискусните кондициски тренери во Македонија се враќа во Вардар по 15 години (последен пат таму беше во 2009 година). Далип, кој зад себе има плодна работа во Шкендија и интернационално искуство во Саудиска Арабија и Бугарија, ќе има клучна улога во спроведувањето на агресивниот стил кој го бара Фабијани.
