Додека навивачите бараа засилувања за да се спаси сезоната, Реал Мадрид го затвори јануарскиот преоден рок со нула евра инвестиција. Ова е веќе традиција, а последното зимско засилување на клубот беше Брахим Дијаз во далечната 2019 година. Но, овојпат тишината зборува повеќе од кога било.
Хаос на теренот и на клупата
Јануари беше дебитантски месец за заборав. Чаби Алонсо доби отказ по поразот во Суперкупот од Барселона, а неговата замена, Алваро Арбелоа, започна со шокантна елиминација од Купот на Кралот од второлигашот Албасете. Капак на сè беше поразот од Бенфика (4-2), кој го исфрли Реал од топ 8 во Лигата на шампионите, принудувајќи ги на дополнителни бараж-натпревари.
Списокот на желби е долг, а составот „краток“
И покрај тоа што управата тврди дека тимот е комплетен, реалноста на теренот вели поинаку. По повредите на Милитао и Ридигер, одбраната „крпи“ со младиот Раул Асенсио кој игра нецелосно фит. Средината на теренот, пак, сè уште тагува по пензионираните Крос и Модриќ, за кого не беа понудени нови договори.
Клубот ги одби сите понуди од агенти во јануари, држејќи се до својот став дека зимскиот пазар е „прескап и неквалитетен“. Единствениот потег беше праќањето на младиот Ендрик на позајмица во Лион, откако Бразилецот речиси и да не добиваше шанса кај Алонсо.
Што нè чека летово? Голема чистка и нови ѕвезди
Ако јануари беше тивок, летото мора да биде бурно. На радарот на Флорентино Перез се неколку звучни имиња:
- Нико Паз: Реал планира да ја активира откупната клаузула од 9 милиони евра за да го врати своето „дете“ од Комо.
- Алексис МекАлистер: Иако е тешко да се извлече од Ливерпул, Аргентинецот е голема желба уште од времето на Анчелоти.
- Витиња и Енцо Фернандез: Желби кои се граничат со невозможна мисија поради договорите со ПСЖ и Челси.
- Кис Смит: Младиот играч на АЗ Алкмар е новиот фаворит на скаутите, вреден околу 60 милиони евра.
На излезна врата се легендите кои веќе не се во плановите, како Давид Алаба и веројатно Дани Карвахал, на кого му истекува договорот.
Дали ова е само „затишје пред бура“ или Реал Мадрид влегува во опасна фаза на стагнација? Навивачите веќе го бараат одговорот и тоа со транспаренти против Перез.
