Француската двојка Лоренс Фурние Бодри и Гијом Сизерон го освоија златниот медал во уметничко лизгање (танцови парови) на Зимските олимписки игри во Милано-Кортина 2026. Во неверојатно тесна завршница, Французите успеаја да ги победат светските шампиони од САД, Медисон Чок и Еван Бејтс, со разлика од само 1.43 поени.
Рекорд за учебниците: Гијом Сизерон е чудо од спортист!
Главната приказна на вечерта е токму Гијом Сизерон. Со ова злато, тој стана првиот лизгач во историјата на овој спорт кој успеал да освои две последователни олимписки златни медали со две различни партнерки.
Пред четири години во Пекинг доминираше со Габриела Пападакис, а вечерва во Милано го повтори подвигот со Лоренс Фурние Бодри, по само една година заедничко тренирање. Ова е успех кој тешко дека некогаш ќе биде повторен.
Магија на мразот: „Китот“ против „Paint It Black“
Францускиот пар настапи на емотивната музика од филмот „The Whale“ (Китот), демонстрирајќи совршена прецизност и движења кои ги оставија судиите без здив. Иако Сизерон имаше мал „кикс“ во еден момент, нивната техничка супериорност беше пресудна за конечниот резултат од 225.82 поени.
Од друга страна, Американците Чок и Бејтс беа фасцинантни со својата изведба на култната „Paint It Black“ од Ролинг Стоунс. Иако ја имаа поддршката од публиката и извозеа најдобро во својата сезона, тоа беше доволно само за сребро, што е нивни прв индивидуален олимписки медал во нивната 15-годишна заедничка кариера.
Канада се закити со бронза
На третото скалило од победничкиот подиум се искачија Канаѓаните Пајпер Гилс и Пол Поарие, кои со 217.74 поени го потврдија својот статус во светскиот врв и го освоија својот прв олимписки медал по три учества на Игрите.
Милано вечерва славеше уметност на лизгалки, но името на Гијом Сизерон ќе остане врежано како синоним за перфекција која не познава граници и партнери.
