Капитенот на Ливерпул, Вирџил ван Дајк, не бараше изговори по понижувачкиот пораз од 4-0 против Манчестер Сити во четвртфиналето на ФА Купот. Искусниот дефанзивец упати јавно извинување до навивачите и призна дека тимот едноставно психички „потонал“ во второто полувреме на „Етихад“.
Овој пораз ги остави „црвените“ со само една шанса за трофеј до крајот на сезоната – Лигата на шампионите, каде веќе в среда ги очекува пеколно гостување кај актуелниот европски првак ПСЖ.
„Болно е, но на теренот изгледаше како да се откажавме“
Холандскиот интернационалец беше критичен кон себе и соиграчите за начинот на кој дозволија Сити да постигне четири гола во интервал од само 20 минути околу паузата меѓу двете полувремиња.
„Можам само да им се извинам на навивачите за тоа што го покажавме, особено во вториот дел. Излеговме од соблекувалната со намера да израмниме, но се случи спротивното. Да се вратите од 3-0 на овој терен е тешко, но не смеете да се предадете, а тоа е токму она што ни се случи во еден момент. Ги изневеривме фановите, се изневеривме себеси, но и менаџерот“, изјави Ван Дајк.
Притисокот врз Арне Слот расте
Иако Слот минатата сезона донесе титула во Премиер лигата, оваа сезона е вистински кошмар за Ливерпул со дури 15 порази во сите натпреварувања. Сепак, Ван Дајк застана во одбрана на својот сонародник на клупата.
„Тој е одговорен како менаџер, но ние сме тие на теренот што мора да ја завршат работата. Квалитетот е тука, но моментално сме во фаза на транзиција и мора повторно да го најдеме тоа заедништво кое нè красеше со години. Тешко е да се игра на секои три дена ако ја немаме таа константност“, додаде капитенот.
ПСЖ е зад аголот: Последна шанса за спас на сезоната
Ливерпул нема време за анализи бидејќи в среда гостува во Париз на првиот меч од четвртфиналето во ЛШ. По дебаклот во Манчестер, натпреварот против „светците“ станува „биди или не биди“ за целата сезона.
„Го гледав ПСЖ во петокот, ќе биде екстремно тешко. Ако сакаме да извлечеме нешто од оваа сезона, мора да направиме нешто специјално во следните три натпревари. Секој мора да се погледне во огледало и да види каде греши“, заклучи Ван Дајк.
Покрај европските предизвици, Ливерпул го чека и жестока битка во Премиер лигата, каде моментално се наоѓаат на петтото место, борејќи се да обезбедат влез во елитата и за следната година.
