Двократниот европски шампион, Вардар, веќе почна да го крои тимот за следната сезона. Најновото име во таборот на „црвено-црните“ е талентираниот хрватски интернационалец Леон Љевар, кој стави потпис на договор со важност од две години.
Љевар доаѓа во Скопје како докажан стрелец од словенечкиот клуб Слован. На својата позиција како лев бек, тој доминираше во Европската лига оваа сезона, постигнувајќи дури 44 погодоци. Со висина од 198 сантиметри, хрватскиот ракометар треба да донесе дополнителна моќ и сигурност во бековската линија на Вардар.
„Голема чест е да се потпише за клуб со ваква историја како Вардар. Се радувам на предизвикот и се надевам дека ќе му помогнам на тимот да ги оствари сите зацртани цели“, изјави Љевар при промоцијата.
Иако поради повреда го пропушти последното Европско првенство, тој е редовен член на поширокиот список на хрватската репрезентација и важи за еден од најперспективните бекови во регионот. Неговото доаѓање во Скопје е закажано за почетокот на следната сезона.
