Наместо фудбалски празник, навивачите на Милан доживеаја нова фудбалска катастрофа. „Росонерите“ претрпеа тежок пораз на домашен терен од Аталанта со 2-3, резултат кој не само што ја продлабочи резултатската криза, туку и сериозно го загрози пласманот во Лигата на шампионите. Со само седум освоени бодови во исто толку натпревари, тимот на Макс Алегри сега падна на делба на четвртото место со Рома, додека Јувентус изби пред нив на табелата.
Натпреварот започна во тензична атмосфера поради масовните протести на „Курва Суд“ против извршниот директор Џорџо Фурлани.
На теренот, работите тргнаа наопаку уште во раната фаза. Иако Рабио ја погоди стативата, Аталанта прва удри преку Едерсон. Пред домашните да се соземат, веќе беше 0-2 откако Давиде Запакоста мајсторски го совлада Мајк Мењан. Фрустрацијата кај играчите беше очигледна, особено кај Рафаел Леао, кој заработи жолт картон и ќе го пропушти следниот меч против Џенова.
Празни трибини и задоцнет одговор на „росонерите“
Кога Џакомо Распадори во второто полувреме погоди за убедливи 0-3, трпението на навивачите пукна. Голем дел од публиката го напушти стадионот уште во 55-тата минута, оставајќи ги празни трибините на „Сан Сиро“ како јасен знак на незадоволство. Алегри се обиде со измени, но повредите на Лофтус-Чик и Бартезаги дополнително ја отежнаа ситуацијата.
Милан дури во финишот покажа знаци на живот. Страхиња Павловиќ го постигна првиот гол за домаќините по повеќе од 300 минути „пост“ на домашен терен, а Кристофер Нкунку во судиското продолжение реализираше пенал за 2-3.
Сепак, тоа беше премалку и прекасно. „Росонерите“ не само што ги загубија бодовите, туку за следниот натпревар останаа и без суспендираните Леао, Еступињан и Салемакерс, што ја става екипата во речиси безизлезна ситуација пред финишот на сезоната.
