Светот на ски-скоковите има нов (стар) владетел. Домен Превц е во животна форма и пристигнува на култната скокалница во Енгелберг со серија од четири последователни победи во Светскиот куп. По двојниот триумф во Висла, Словенецот го повтори успехот и во Клингентал, Германија, зацврстувајќи се на врвот во генералниот пласман.
„Домен-ација“ во Германија
Викендот во Клингентал помина во знакот на Превц. Во саботата, тој победи убедливо со скокови од 142.5 и 143 метри, оставајќи ги зад себе повратникот Штефан Крафт (кој паузираше поради раѓањето на првото дете) и домашниот миленик Филип Рајмунд.
Неделата донесе поголема неизвесност. Иако Рјоју Кобајаши беше блиску по првата серија, Превц со скок од 140.5 метри во втората серија ја осигура победата со 13 поени предност.
„Бев навистина нервозен на врвот бидејќи нозете ми беа крути од вчера… но среќен сум што победив повторно. Сакам оваа серија да трае што е можно подолго“, изјави Превц по четвртата победа во низа.
Во моментов, Превц води во трката за Кристалниот глобус со 159 поени предност пред Кобајаши.
Енгелберг: Последна станица пред „Четирите скокалници“
Следниот викенд (19-21 декември), караванот се сели во Швајцарија. Енгелберг е местото каде формата се темпира за престижната „Новогодишна турнеја“. Историјата е на страната на Домен Превц – тој го држи рекордот на скокалницата со 144 метри, поставен уште во 2016 година.
Вест на денот: Велингер исфрлен од тимот!
Додека Словенците слават, во германскиот табор владее криза. Двократниот олимписки шампион Андреас Велингер нема да патува во Енгелберг. По катастрофалните резултати (39., 47., 40. и 57. место на последните натпревари), тој е повлечен од тимот за да тренира индивидуално во Оберстдорф пред стартот на турнејата. Неговото место го зазема младиот Бен Баер.
Од друга страна, легендарниот Симон Аман (44 години) продолжува да пркоси на годините и ќе настапи пред домашната публика со цел да обезбеди учество на своите осми Олимписки игри.
Следете нè: Facebook | Instagram | X
