Четвртокот во Евролигата донесе серија возбудливи натпревари. Додека Олимпијакос и Жалгирис ги покорија Истанбул и Милано, Баерн Минхен и Реал Мадрид ја искористија предноста на домашниот терен за важни победи во трката за плејофот.
Баерн преку Валенсија до нов триумф, солиден Димитријевиќ
Во „САП Гарден“, Баерн Минхен се врати на победничките патеки со триумф над Валенсија од 93:89. Баварците во текот на целиот меч ја контролираа играта, а нашиот Ненад Димитријевиќ одигра клучна улога во организацијата со постигнати 12 поени. Владимир Лучиќ беше непогрешлив со 19 поени (10/10 од линијата за слободни фрлања), додека Валенсија го претрпе третиот пораз во низа и покрај 20-те поени на Тејлор.
Олимпијакос ја продолжи серијата кај очајниот Ефес
Олимпијакос ја запиша четвртата победа по ред, славејќи во Истанбул против Анадолу Ефес со 68:74. „Црвено-белите“ од Пиреја доминираа во првиот дел (31:48), а иако Ефес се врати во финишот, искуството на Сашa Везенков (19 поени) пресуди. За Ефес ова е веќе осми пораз во низа, со што тимот тоне сè подлабоко на табелата.
Жалгирис со херојски пресврт во Милано
Екипата на Жалгирис извојува четврта последователна победа на гостувањата кај Олимпија Милано, овојпат со 82:86. Силван Франциско беше херојот на Литванците со 25 поени, засенувајќи ја одличната партија на Шавон Шилдс (27 поени). Милано водеше во третиот период, но Жалгирис со серија тројки во финишот направи целосен пресврт.
Реал Мадрид сигурен во дербито против Монако
Реал Мадрид ја забележа својата шестта победа во низа откако го совлада Монако со 90:78. Факундо Кампацо со дабл-дабл учинок од 17 поени и 10 асистенции беше моторот на „кралевите“, додека Треј Лајлс додаде 20 поени. Кај Монако најрасположен беше Мајк Џејмс со 19 поени, но тоа не беше доволно да се спречи поразот во Мадрид.
Макаби во трилер го „преживеа“ шампионот Панатинаикос
Во исклучително тесен натпревар, Макаби Тел Авив славеше над Панатинаикос со 75:71. Ифе Лундберг (16 поени) и Тамир Блат (15 поени) беа најефикасни кај домаќинот. Грчкиот тим имаше шанси за победа во последната минута, но неколкуте промашени шутеви за три поени му овозможија на Макаби да ја зачува предноста и да дојде до својот десетти триумф.
Дубаи со доминација среде Париз
Новиот евролигаш Дубаи покажа застрашувачка офанзивна моќ, победувајќи го Париз на негов терен со убедливи 79:99. Српскиот центар Филип Петрушев одигра натпревар за паметење со 21 поен и 9 скокови, додека Кабенгеле додаде 17 поени. Дубаи ја реши дилемата за победникот уште во првото полувреме (32:52) и рутински ја одржа предноста до крајот.
