По бледото реми (2-2) против Јапонија, селекторот на Холандија, Роналд Куман, се најде под лавина критики во својата татковина поради бавната игра и лошите тактички одлуки. Неговиот одговор пристигна на стадионот во Хјустон, каде „Лалињата“ одиграа брилијантен натпревар и со убедливи 5-1 ја демолираа Шведска, со што практично го осигураа својот пласман во 1/16 финалето на Мундијалот.
Од првиот судиски свиреж беше јасно дека Холанѓаните сакаат да испратат моќна порака. Со константни и агресивни напади, тие целосно ја разбија дефанзивната линија на Шведска, покажувајќи зошто повторно важат за едни од фаворитите од сенка на овој турнир.
Апсолутна доминација на „Англичаните“ и јубилеен погодок
Интересен податок за овој натпревар е тоа што сите шест голови беа постигнати од фудбалери кои настапуваат во англиската Премиер лига, а Холандија по вторпат на турнирот не стартуваше со ниту еден играч од домашното првенство (Ередивизија).
Куман направи изненадување ставајќи го Брајан Бробеј (Сандерленд) во почетниот состав на местото на Крисенсио Сумервил, и тоа се покажа како полн погодок. Веќе во 5-та минута, по акција од само седум допири која почна од голманот Вербруген, Бробеј погоди по асистенцијата на Коди Гакпо.
Во 17-та минута, Бробеј го постигна својот втор гол, овој пат по одлично нафрлување на Дензел Думфрис.
Шведска се обиде да возврати, но голот на Густаф Лагербиелке пред крајот на полувремето беше поништен поради офсајд. На стартот од вториот дел, Коди Гакпо (Ливерпул) зголеми на 3-0 по нова асистенција на Думфрис, за веќе во 54-та минута истиот играч да зголеми на 4-0.
Вториот гол на Гакпо имаше и историско значење – тоа беше 100-тиот гол на овој Мундијал постигнат на само 33 натпревари, што е најбрзо стигнување до „стотка“ на Светските првенства уште од 1958 година!
Џокерот Сумервил ја докрајчи Шведска
Шведска, предводена од селекторот Грем Потер, изгледаше целосно загубено во поголемиот дел од мечот. Иако преминот од формација со тројца во формација со четворица дефанзивци донесе мала стабилност, нивните премиерлигашки ѕвезди во нападот, Александер Исак (Ливерпул) и Виктор Ѓекереш (Арсенал), беа целосно отсечени и изолирани. Единствената утеха за Швеѓаните дојде во 59-та минута кога Ентони Еланга (Њукасл) постигна почесен погодок за 4-1.
Сепак, конечниот збор го имаше Крисенсио Сумервил (Вест Хем). Тој влезе на полувремето и одигра фантастично – директно учествуваше во креирањето на третиот и четвртиот гол на Холандија, а во самиот финиш со прецизен удар во долниот агол ги постави конечните 5-1, иако подоцна заработи незгоден удар во главата.
Холандија сега е лидер во Групата Ф со четири бода и во последното коло ќе игра против Тунис во Канзас Сити. Шведска, пак, се наоѓа во тешка ситуација и ќе мора да брка позитивен резултат против Јапонија во Далас за да избегне рана елиминација.
