Удинезе 0-1 Интер
Интер продолжува со својот сигурен марш на врвот на табелата, овојпат со минимална победа на гостувањето кај Удинезе. Херој на „Нероазурите“ повторно беше Лаутаро Мартинез, кој во 20-та минута одлично се снајде по асистенцијата на младиот Франческо Пио Еспозито и со прецизен удар донесе три бода.
Овој триумф беше еден вид „одмазда“ за поразот на Интер од овој противник во август, со што тимот на Кристијан Киву го потврди статусот на главен фаворит за титулата. Удинезе се обиде да се врати во финишот преку Кеинан Дејвис, но одбраната на Интер и голманот Сомер беа на висина на задачата за уште една чиста мрежа.
Наполи 1-0 Сасуоло
Станислав Лоботка конечно го прекина својот голгетерски пост долг три години, носејќи му важна победа на Наполи против Сасуоло на „Диего Армандо Марадона“. Словакот најдобро реагираше на една одбиена топка по ударот на нашиот Елиф Елмас и ја затресе мрежата во седмата минута, што се покажа како одлучувачки момент.
Сепак, победата остана во сенка на новите повреди кои го десеткуваа тимот на Конте. Елмас мораше да го напушти теренот по удар во главата, а со повреди се здобија и Рахмани и Политано. И покрај тоа, Наполи успеа да го издржи притисокот на Сасуоло во финишот, благодарение на одличните интервенции на Милинковиќ-Савиќ на гол линијата.
Каљари 1-0 Јувентус
Најголемото изненадување на денот се случи на Сардинија, каде Каљари успеа да го сопре залетаниот Јувентус на Лучијано Спалети. Човек на одлука беше Лука Мазители, кој во 65-та минута со прекрасен волеј удар по една уиграна акција од слободен удар го совлада Матија Перин.
Јувентус доминираше во поседот и создаде неколку одлични шанси преку Кенан Јилдиз и Фабио Мирети, но голманот на Каљари, Елиа Каприле, имаше вечер за паметење со неколку спектакуларни одбрани. Кога и тој беше совладан, стативата го спаси домашниот тим по ударот на Јилдиз, оставајќи ги „Бјанконерите“ без бодови на ова тешко гостување.
