Светот на кошарката синоќа сведочеше на нешто што се случува еднаш во неколку децении. Центарот на Мајами Хит, Бам Адебајо, одигра натпревар за историја, постигнувајќи неверојатни 83 поени во победата над Вашингтон Визардс од 150-129.
Со овој подвиг, Адебајо официјално го претекна легендарниот Коби Брајант (81 поен) и сега го држи вториот најдобар стрелачки учинок на еден натпревар во историјата на НБА лигата, веднаш зад недостижните 100 поени на Вилт Чемберлен од 1962 година.
Фуриозен старт: 31 поен уште во првата четвртина!
Дека ова ќе биде посебна ноќ се виде уште во првите 12 минути. Адебајо ја започна серијата со неверојатни 31 поен во првата четвртина, погодувајќи 10 од своите први 16 шутеви. До полувремето, тој веќе имаше 43 поени на своето конто, а доминацијата продолжи и во третиот дел кога стигна до бројката од 62 поени.
83 POINTS FOR BAM ADEBAYO.
— NBA (@NBA) March 11, 2026
THE SECOND-MOST EVER.
Wilt: 100
Bam: 83
Kobe: 81 pic.twitter.com/5AxI6j8m35
Моментот кога падна рекордот на „Мамбата“
Прашањето во последната четвртина не беше дали Мајами ќе победи, туку дали Бам може да го надмине рекордот на Коби поставен пред точно 20 години. На нешто повеќе од една минута пред крајот, Адебајо најпрво се израмни со Брајант преку две слободни фрлања, а потоа со уште два прецизни удари од линијата стигна до магичната бројка 83.
Целата арена во Мајами стана на нозе за да го поздрави својот нов херој, кој покажа дека границите во модерната кошарка постојат само за да бидат срушени.
