„Штрајф“ повторно покажа зошто е најтешката патека на светот, но денеска доби нов господар. Младиот Италијанец Џовани Францони (24) го приреди изненадувањето на сезоната, победувајќи на култниот спуст во Кицбил, пред очите на ѕвезди како Арнолд Шварценегер и Златан Ибрахимовиќ!
Откако минатиот викенд во Венген ја забележа својата прва победа во Супер-Џи, Францони денеска покажа дека е роден за големи дела. Со стартен број 1, тој постави време кое никој не успеа да го надмине, дури ниту „вонземјанинот“ Марко Одермат.
Одермат „краток“ за седум стотинки
Марко Одермат, кој вчера победи во Супер-Џи, беше апсолутен фаворит. Швајцарецот скијаше одлично во горниот дел, но техничките свиоци во долниот дел од патеката беа пресудни. На крајот, семафорот покажа +0.07 секунди заостанување зад Италијанецот.
„Се чувствувам глупаво што сум толку разочаран од второ место во Кицбил, но сите знаат дека победа овде ми е животен сон. Денеска не успеав,“ искрено призна Одермат по трката.
Французинот Музатон на подиум по 9 години
Третото место му припадна на Максенс Музатон од Франција (+0.39), кој со сензационално возење стигна до својот прв подиум во Светскиот куп уште од 2017 година.
Трката беше вистински спектакл со многу драматични моменти, вклучувајќи и неколку „за влакно“ избегнати падови на Мурисие и Хемерсбергер, кои ја кренаа публиката на нозе.
Со оваа победа, Францони се промовираше во сериозен кандидат за медал на претстојните Олимписки игри во Милано-Кортина, кои ќе бидат на негов домашен терен.
