Лигашката фаза на Лига Европа заврши со вистински спектакл. Додека некои ги потврдија своите места во осминафиналето, други во последен момент „купија карта“ за нокаут-фазата, а тинејџерите станаа херои на вечерта.
Пресврт за паметење: 19-годишниот Џимо-Алоба ја спаси Вила
Астон Вила покажа зошто е еден од главните фаворити за трофејот. Иако губеа со 0:2 на домашен терен од Салцбург и го загубија првиот стрелец Оли Воткинс поради повреда, избраниците на Унаи Емери извлекоа победа од 3:2.
Херој на вечерта беше младиот Џамалдин Џимо-Алоба, кој во 87-та минута го постигна својот прв сениорски гол за комплетен пресврт. Со овој триумф, Вила заврши на второто место на табелата, веднаш зад Лион.
Лион е „крал“ на табелата, Селтик се провлече во плеј-офот
Францускиот Лион ја потврди доминацијата со победа од 4:2 над ПАОК, завршувајќи ја фазата со седум победи од осум меча. Натпреварот започна со емотивен момент и минута молк за загинатите навивачи на грчкиот тим.
Во Глазгов, пак, Селтик славеше над Утрехт (4:2) во меч каде што три гола беа постигнати во првите 19 минути. Оваа победа беше клучна за Шкотите да обезбедат место во плеј-офот, за разлика од нивните ривали Ренџерс каде игра нашиот Миовски, кои со поразот од Порто (3:1) ја завршија својата очајна европска сезона.
Нотингем Форест со „четворка“, Рома со десетмина до осминафинале
Нотингем Форест одигра моќно против Ференцварош (4:0) со двата гола на Игор Жезус, завршувајќи на 13-тото место, што им носи повластена позиција во плеј-офот.
Еден од најважните бодови го освои Рома, која иако играше со играч помалку од 15-тата минута, успеа да извлече 1:1 против Панатинаикос. Овој бод беше доволен за „волчицата“ да го заземе осмото место и да обезбеди директен пласман во осминафиналето, избегнувајќи ги дополнителните мечеви во февруари.
Директно во осминафинале (Топ 8): Лион, Астон Вила, Митјиланд, Реал Бетис, Порто, Брага, Фрајбург и Рома.
