Во одложениот натпревар од 16-то коло на Серија А, Милан оствари клучна победа против Комо со 1-3, иако домашниот тим на Цеск Фабрегас беше подобар противник во поголемиот дел од мечот. Херој на вечерта беше Адриен Рабио, кој изнуди пенал и постигна два гола, но пофалбите одат и на адреса на Мајк Мањан за неговите нереални одбрани.
Комо доминираше, Мањан „леташе“
Натпреварот започна со целосна доминација на Комо. Веќе во 10-та минута, Марк-Оливер Кемпф со глава го доведе домаќинот во водство по центаршутот на Батурина. Милан беше во подредена улога, а само благодарение на Мајк Мањан, резултатот не стана убедлив. Францускиот голман со неколку „чудесни“ интервенции ги сопре ударите на Нико Паз и Да Куња од непосредна близина.
Пресврт против текот на играта
Пред самиот крај на полувремето, кога Комо имаше сè под контрола, Салемакерс го проигра Рабио, кој беше фаулиран од Кемпф во шеснаесеттникот. Кристофер Нкунку беше прецизен од белата точка за 1-1, иако Рафаел Леао првично сакаше да го изведе пеналот, но Макс Алегри одлучи дека Нкунку е прв избор.
Мајсторството на Рабио и несреќата на домаќинот
Во второто полувреме, Милан покажа зошто е кандидат за титулата. Во 55-та минута, по една мајсторија на Леао, Рабио прими топка на гради и со полуволеј донесе водство од 1-2. Комо се обиде да се врати, Нико Паз двапати ја погоди рамката од голот (пречка и статива), но казната стигна во 88-та минута кога Рабио со својот втор гол со прецизен удар од далечина ги постави конечните 1-3.
Со овој триумф и вчерашниот кикс на Наполи кај Парма, Милан повторно е во игра за самиот врв, додека Комо може да жали за пропуштените шанси во натпревар кој статистички целосно го контролираше.
